Etter fleire månader med røystingar og fleire gode fylkesfinalistar, har Norsk Målungdom endeleg kome til dagen der juryen kan presentere vinnarane. Det var mange god kandidatar, og det tok tid før juryen vart samde.

Alle finalistane skilde seg frå kvarandre, og alle er dei verdige vinnarar. Men, som i alle kåringar skal ein stå att med vinnarane. Dei to som kan titulere seg Noregs mest sexy nynorskbrukar 2013 er forfattar Sigmund Løvåsen og folkemusikar Ingebjørg Bratland.

Sigmund Løvåsen (f. 1977) kjem frå Trysil og har gjeve ut kritikarroste bøker som Nyryddinga og Brakk. Frå 2012 er han leiar i Den norske Forfatterforening.

Ingebjørg Bratland (f. 1990) frå Vinje er folkemusikar, kvedar og songarinne. Ho er kjend for si unike evne til å tolke og formidle folkeviser, stev og balladar, og vann i 2006 Spellemannprisen for beste barneplate.

Bakgrunnen for at Løvåsen og Bratland har gått av med sigeren, er at dei båe er usedvanleg vakre, med lure smil og glimt i auga. Dei strålar av sjølvkjensle og glede, noko juryen trekk fram som særleg positivt.

Når dei i tillegg er så gode ambassadørar for nynorsken som dei er, kan det vere liten tvil om at dette er verdige vinnarar.

– Måten dei formidlar nynorsk kultur gjennom litteratur og song, er heilt eineståande. Det er sexy! Vi gratulerer, seier Norsk Målungdom.

Det er medlemsbladet til Norsk Målungdom, Motmæle, som står bak kåringa. I juryen sat Kristina E. Sæterdal, Karl Peder Mork og Anne Straume.