17. mai er akkurat ferdig og ei stolt og takknemleg kjensle legg seg i bevisstheita. Det er flott at vi har eit fritt demokratisk samfunn der alle kan bidra og bli høyrt. Eller kan dei det? For 4 år sidan vart 130 unge under 20 år valt inn i kommune -og bystyre omkring i Noreg. Ei undersøking utført av NRK våren 2023 viser at berre 62 av dei stiller til val igjen. Også lokalt melder partia at det er utfordrande å engasjere til lokalpolitisk arbeid, særleg dei unge.

No er det mange årsaker til fråfall og lite engasjement, men vi må ha dialog og forstå innbyggarane. Nokre ungdomar som vart intervjua i undersøkinga melder at lokalpolitikken er lite seriøs, har tendensiøse personkonfliktar, personangrep og hersketeknikkar. Vidare at det er tøft å stå i storm mot vaksne innbyggarar som konfronterer på butikken eller i gata, på ulike sosiale plattformar og i kommentarfelt. Ein skal ha rygg for å vera ung urøynd og stå i lokalpolitikken. Eg er glad for å sjå initiativ frå politiet og takk til ordførar Knut Erik Engh for å løfte dette 17. mai.

Dersom vi skal halde på tryggleik og framtid på denne vesle øya er det viktig å snakke med ungdomen og kvarandre om demokrati og ansvar. Det er dei unge som skal bere og styre lokalsamfunn i framtida. Kva opptar dei? Korleis kan vi ta dei i vare, inkludere dei betre i prosessar, og korleis kan vi få dei på lag og saman bygge og utvikle?

KS kom i 2019 med ei tiltakspakke til kommunene for å forebygge og håndtere hat, trugsmål og hets mot folkevalde. Kvar er kommunestyra, kommunedirektørane, partia og media i dette arbeidet? Vi må verje lokaldemokratiet og engasjere dei unge for å få ei god framtid. Hareid Høgre har ei god liste, men som andre parti treng vi engasjere fleire, særleg dei aller yngste.

Ole Frank Bakken, Hareid Høgre