Tysdag kveld den 22.08 var eg på eit møte i Helsehuset på Hareid. Oppdrettsselskapet MOWI ASA hadde eit møte for å orientere dei frammøtte om planane dei hadde.

Dei ønska å starte oppdrett i lokaliteten Uravika på Hareid, og ville søkje kommunen om løyve til å legge ut merdar for oppdrett av laks. MOWI ASA møtte opp med 5 skarpskodde representantar frå selskapet.

Dei var flinke til å legge fram sitt syn, og det var berre fordelar for kommunen meinte dei.

Kommunen ville få 5 millionar i eingongstilskot for plassen/lokaliteten (Uravika) I tillegg kunne det kome midlar frå havbruksfondet etter kvart.

Så kunne det bli 8 arbeidsplassar på anlegget, og lokale bedrifter kunne bli engasjert med jobb.

Det var ei stund eg lurte på kvifor eg hadde komme på møtet. Alt var jo berre positivt av det som var sagt so langt.

No var det vår jobb å kome med motargument for oss som sat på andre sida av bordet, viss ein kan seie det på den måten.

Ordet var fritt. Eg hadde ordet fleire gonger. Likevel hadde eg ein følelse av at vi som var imot opne merdar ikkje greidde å uttrykkje oss godt nok.

Det med forureining slapp dei alt for billeg unna med.

Eg har aldri vore under ei fiskemerd, men har snakka med personar som har vore der og sett. Dei seier at det finst ikkje liv. Det gjeld ført og fremst ved anlegga som ligg der det er lite gjennomstrøyming.

Om lakselusa slapp dei også billeg unna.

Eg fekk ikkje med meg om MOWI hadde slutta å bruke giftbad for å kvitte seg med lakselus på fisken. Den gifta som har vore brukt drep ikkje berre lusa, men også skaldyr på sjøbotnen.

Så det er ikkje tvil om at oppdrettsnæringa har skuld i tilbakegangen av laks og sjøørret.

Nei, sjøørreten er ikkje heilt utrydda her på Vestlandet, men den har blitt kraftig redusert.

Villaksen er også trua og det er ein grunn til at den nå er komen på raudelista for trua fiskearter.

I år har elvefisket etter laks vore litt positivt i enkelte elvar her på Sunnmøre. Kan nemne spesielt Bondalselva. Der har fisket vore bra i år. Den som hugsar litt tilbake var det eit liknande år i 2011. Etter det vart det 10 magre år med lite fisk i elvane.

Håper det ikkje gjentar seg at det igjen blir 10 magre år etter denne sesongen, med bra fiske.

I tillegg til det som har vore nemnt vil dette anlegget som er planlagt i Uravika legge beslag på store areal i sjøen. Og vi vil miste ein av det beste fiskeplassane i Hareid kommune. Vi veit elles at fisk som er fiska i nærleiken av oppdrettsanlegg har forringa kvalitet. For fisken et både forspill og avføring.

Støy og lyssetting var også nemnt som negativt på møtet.

Ein kan ikkje vere mot alt. Liker forresten ikkje ordet mot, vil heller bruke for.

For trivsel, reint hav og fri natur.

Roger Korsnes Hareid