Lanserer fargekolleksjon inspirert av lokal natur

Flø og Blåtinden får sin eigen unike farge.

Lokal kolleksjon Nordsjø Ide&Design Ulsteinvik/Fosnavåg og instagram-profilen Laila Lillerovde har gått saman og laga sin eigen kolleksjon fargar med lokale fargenavn. F.v. daleg leiar ved Nordsjø Ide&Design Ulsteinvik/Fosnavåg, Agathe Teige Eiksund og Laila Lillerovde  Foto: Steffen Voldsund

Næringsliv

Nordsjø Ide&Design Ulsteinvik/Fosnavåg og instagram-profilen Laila Lillerovde har gått saman og laga sin eigen kolleksjon fargar med lokale fargenavn. Med inspirasjon frå den vakre naturen på søre Sunmøre, så har no både Flø, Rundebranden, Skorpa, Blåtinden med fleire fått sin eigen unike farge.

Nordsjø Ide&Design tok kontakt med Laila Lillerovde denne hausten med bakgrunn i interessa og lidenskapen ho har for interiør og fargar. Lillerovde har meir enn 80 000 følgjarar på sin instagram-profil @villalille, der ho inspirerer publikum frå både inn- og utland ved å dele bilete frå heimen sin på Nautøya i Herøy.

Ideen om ein unik og lokal fargekolleksjon starta i butikklokala i Sjøgata i Ulsteinvik. Butikksjef Ingelill Brekke, har lang erfaring innan malingsfaget og blei kalla «master tweeker» dei åra ho jobba i Canada. Brekke blandar og lagar alle fargar ved at ho justerar dei manuelt. Ei unik moglegheit for målarforretninga, som dermed er opphavet til denne ideen.

Etter ein telefonsamtale og ein kaffekopp på Madelynn var samarbeidet med Lillerovde i gang:

- Det har vore eit utruleg kjekt og inspirerande samarbeid. På kort tid har Laila klart å opparbeide seg ein fanskare på meir enn 80 000 følgjarar på instagram-profilen sin. Det er fantastisk!  Laila merkar seg ut ved at ho har klart å skape sin eigen stil, og ved hjelp av fargar skapar ho varme og atmorsfære i heimen sin, seier dagleg leiar i Nordsjø Ide&Design Ulsteinvik/Fosnavåg, Agathe Teige Eiksund.

Samarbeidet har resultert i tjue unike fargar som har fått namn etter vakre naturperler som gir oss gode assosiasjonar. Lillerovde omfavnar både konseptet, naturen og fargane:

- Eg tente på ideen med ein gong! Det å kunne få gjenskape dei gode kjenslene naturperlene våre gir oss, i ein eigen farge? Magisk!, seier Lillerovde.

-  Fargane gjer noko med oss, og har ein direkte påverknad på sinnet vårt. Fargane vi omgir oss med i naturen gjer oss rolege. Det kan ikkje vere tilfeldig at blått og grønt er dei to fargane som går igjen som fargefavorittar, det er himmel og hav, skog og mark. Eg synest det er flott med ei bevisstgjering omkring vårt forhold til fargar. Dei siste 15 åra har våre rimeleg fargelause, og det er vanskeleg å skape stemning og atmosfære med eit kvitt interiør, seier Eiksund.

Lokale fotografar har bidratt med flotte landskapsbilete frå distriktet, og Nordsjø Ide&Design Ulsteinvik/Fosnavåg kan no presentere ei flott brosjyre med alle fargane, samt fargepalettar tilhøyrande desse bileta. Store fargeprøver er tilgjengeleg i butikkane.

Eiksund håpar at dette kan inspirere fleire til å våge å velge fargar på veggane i heimen sin:
- Fargar er rett og slett eit fantastisk verkemiddel for å skape god atmosfære, seier Eiksund. 

Det vil bli arrangert lanseringsfest for «Havlandet i fargar» hos Nordsjø Ide&Design Ulsteinvik onsdag 8. mars og hos Nordsjø Ide&Design Fosnavåg torsdag 16. mars. Det vil vere ope for alle å delta.