Torsdag i neste veke opnar Dimo si nye avdeling i Saunesmarka dørene for publikum. Då lokalavisa tok turen innom onsdag var dei tilsette godt i gang med å gjere lokala klare til den store opningsdagen. Det 700 kvadratmeter store verkstadlokalet, som Rolls-Royce nytta fram til i fjor, er det Dimo som no skal ha. Også kontorlokala i første etasje i bygget er det Dimo som skal nytte. I dei nye lokala blir det servicesenter og Parkerstore, ein butikk for produkta Dimo fører for det internasjonale selskapet Parker.
– Vi meiner det var rett tid no å satse på ei utviding. Behovet gjorde at vi måtte ta grep. Vi gler oss til å kome i gang for fullt her, seier Nils Petter Haddal, salssjef ved den nye avdelinga.
Opnar ny butikk
Dimo opnar altså ein ny butikk både for private og næringsdrivande i lokala i Saunesmarka, ein såkalla Parkerstore.
– Det er ein målretta strategi av Parker i Norge, å satse meir på distributørane. Vi opnar butikk der vi sel produkta til det som er verdas største komponentleverandør innan hydraulikk. Det er vi sjølvsagt veldig stolte over.
I tilknyting til butikken har ein slangeverkstad kome på plass, derav tilnamnet Hose Doctor. Slangeverkstaden på Hareid blir dermed flytta til Saunesmarka.
– Vi legg opp eit stort lager av hurtigkoplingar, slangar, ventilar, pumper, røyrdelar, måleinstrument og racorfilter, og alle filter som seglande skip og fritidsbåtar har behov for. Om vi ikkje har det kunden ønskjer, skaffar vi det på nokre dagar, seier Haddal
Mobilhydraulikk er eit nytt satsingsområde for Dimo AS, og i Saunesmarka kan ein kjøpe og få reparert hydraulikkomponentar til lastebilar, bussar og fleire andre køyretøy og maskiner.
– Kunden som har behov for hjelp kan komme innom Dimo Servicesenter eller serviceingeniøren kan reise ut til kunden, seier Nils Petter Haddal.
Vekst førte til større plassbehov
Dimo AS starta opp i si noverande form i 2011, og omsetningstala for dei tre åra før fjoråret var jamne. Men så skjedde det noko.
– Vi hadde gode tal i tre år på rad. Men omsetninga låg på same nivå om ein samanliknar desse åra. På rundt 45 millionar kroner. I 2017 derimot, opplevde vi ein god vekst. Den veksten held fram også i år, og behovet for meir plass har verkeleg gjort seg gjeldande, seier Haddal.
I 2017 hadde Dimo heile 56 millionar kroner i omsetning.
– Vi ligg an til å toppe det i år, seier Nils Petter Haddal.
Stor serviceavdeling
I lokala i Saunesmarka har Dimo som sagt 700 kvadratmeter verkstadhall å boltre segi.
– Den plassen har vi behov for. Vi har mykje spanande på gang no, seier servicesjef Joar Øvrelid.
Her satsar verksemda på å ta i mot pumper, motorar, sylindrar og meir til overhaling og testing.
– I tillegg til dei fem serviceingeniørane vi har, har vi også tilsett eigen inneserviceansvarleg. Det er ei stilling vi ikkje har hatt før, men som vi ser behovet for, seier Øvrelid og legg til:
– Vi har ein del faste serviceavtalar, som heilt klart er viktige for oss, og som gjer at vi til ei kvar tid har mykje aktivitet. Skal vi klare å ta unna oppdraga våre er det viktig å ha nok plass til å utføre arbeidet på.
Ved avdelinga blir det også utleige av diverse hydrauliske aggregat i ulike storleikar og riggar til flushing.
Vekst i ei tøff tid
Den tøffe situasjonen i den maritime næringa har også Dimo kjent på, men sidan verksemda har mange bein å stå på, har verksemda opplevd vekst i ei tid der mange aktørar i regionen har opplevd nedgang.
– Vi er mykje inne på fiskebåtar og ferjer for tida. Vi har også selt til offshore igjen, tre hydrauliske anlegg, og det kan sjå ut til at det byrjar å bevege seg litt der også igjen. Det er spanande tider, seier salssjef Nils Petter Haddal til slutt.
