Jernia legg ned i Ulsteinvik

Jernia legg ned butikken sin i Saunesmarka og har opphøyrssal ei tid framover. I dei same lokala, pluss litt til, vil det komme inn ein ny stor aktør. Det er derimot hemmeleg inntil vidare kven dette blir.

Jernvareforretninga Jernia skal ut av Øyehols Varehus, og leggast ned. Ein ny, stor aktør skal ta over lokala. Foto: Ole-Ottar Karlsen Høgstavoll.

Jernia skal ut av Øyehols Varehus i Saunesmarka, og det er inntil vidare kroken på døra for verksemda i Ulsteinvik. Jernvareforretninga må vike for ein ny aktør. Etter det Vikebladet Vestposten kjenner til er det ein stor aktør som skal inn i bygget, men kva for aktør er ikkje offisielt enno.

- Det blir ein spanande ny leigetakar, såpass kan vi seie. Det vil bli ein fin tilvekst til handelsnæringa i Ulsteinvik, fortel Tore Øyehol til Vikebladet Vestposten.

Avtalen med den nye leigetakaren gjer at ein må frigjere plass, og difor må Jernia vike, i tillegg til at ekstra plass må frigjerast. Den nye leigetakaren vil trenge opp i mot 1.400 kvadratmeter, i forhold til Jernia, som nytta rundt 500 kvadratmeter.