– Det er ikkje snakk om så veldig mykje, men noko er det, seier Tina Eilertsen.
Ho jobbar med etablering og utbygging i YX Norge.
Må rydde opp
YX Norge dreiv bensinstasjonen på tomta, som no skal fjernast. Rune Urke i Ulstein Eigedomsselskap, UEKF, fortel at YX er ansvarleg for å ta vekk pumpene, leidningar og tankane som var tilknytt bensinstasjonen.
– Det er dei som skal rydde opp etter seg, seier Urke.
Han stadfestar at det under dette arbeidet vart oppdaga ureining i grunnen, på grunn av lekkasje frå tankane.
Gamle tankar
Tina Eilertsen i YX Norge fortel at dei er godt i gang med å fjerne massen som er ureina.
– Det var ikkje overraskande, vi hadde venta å finne ureining under ein så gamal bensinstasjon, fortel ho.
Er det mykje drivstoff som har leke ut?
– Nei. Det som ligg der er nok veldig gamalt. Drivstofftankane vart skifta ut for rundt tjue år sidan, og vi har ingen grunn til å tru at det har vore lekkasje frå dei nye tankane, seier Eilertsen.
Det er Hareidsfirmaet Brekke & Kleppe som har fått oppdraget med å fjerne den ureina massen.
– Den vert køyrd som spesialavfall og levert i Trondheim, seier Trine Eilertsen.
Kor mykje har dette kosta YX Norge?
– Eg har ikkje lyst til å oppgje eksakt sum, men det er snakk om nokre millionar kroner.
Vil byggje 50 nye leilegheiter i sentrum
Leilegheiter
På tomta skal det byggast leilegheiter. Selskapet Rome AS vil bygge tre leilegheitsblokker i prosjektet, som har fått tittelen Bjørndalvegen Park. Til saman er det planlagt 46 leilegheiter.
Bygginga skulle eigentleg starte rett etter sommaren i år, men Rome AS må vente til YX Norge er ferdig med ryddinga.
– Det har gått lenger tid enn vi hadde venta, men no er vi i rute. Vi byrjar å bygge så raskt som råd, etter at YX har rydda tomta, sa Jogeir Romestrand i Rome AS til Vikebladet Vestposten tidlegare denne månaden.