Mellom Ulstein Arena og Ulsteinvik barneskule er det forslag om å lage til ein sentrumspark. Dette er ifølgje Ulstein kommune ein del av prosjektet «Skulen som møtestad», og prosjektet går blant anna ut på å oppgradere uteområda ved skulane i kommunen.
Rundt 40 frammøtte på Ulstein Arena måndag kveld fekk presentert to ulike forslag, utarbeidd av Ulsteinvik-kontoret til Norconsult AS og Trondheim-baserte Løvetanna Landskap AS.
Fornøgd med forslaga
Kjersti Vengen Jensen, leiar for Frisklivssentralen i Ulstein kommune, er prosjektleiar for «Skulen som møtestad». Ho var svært godt nøgd med forslaga som blei presentert.
– Her har vi to ulike og veldig spanande forslag. Dei er ganske like når det kjem til den heilskaplege tanken, men ulike når det kjem til uttrykk. Det er ein fordel for Ulstein kommune at dei er ulike, for då kan vi gå vidare med arbeidet og vurdere begge to, for så å i dialog med innbyggjarane komme fram til løysingane vi helst ønskjer, seier Kjersti Vengen Jensen.
Landskapsarkitektane presenterte forslaga sine først for dei tilsette på Ulsteinvik barneskule, og både der og på Ulstein Arena var mottakinga svært god, meiner Vengen Jensen.
– Folk er engasjerte, og ønskjer å vere med og seie sine meiningar. Så er det ekstra kjekt at begge firma som har levert forslag kunne halde presentasjonar for oss, slik at vi fekk levandegjere deira tankar om korleis ein slik sentrumspark kan sjå ut, seier ho og legg til:
– Det er godt å sjå at folk bryr seg om nærområdet sitt. Og at dei gjerne ønskjer at skuleområdet oppgraderast til ein sentrumspark, slik at det kan nyttast av alle.
Vegen vidare blir å danne ei arbeidsgruppe, setje saman eit forprosjekt og etter kvart få arbeidet med ein sentrumspark inn i kommunebudsjettet.
«Vertikalt leikelandskap»
Landskapsarkitektane Siri Anette Myklebust (oppdragsleiar), Vigdis Rishaug, Roy A. Hesjedal og Siv Sundgot ved Norconsult AS i Ulsteinvik har sett saman forslaget «Vertikalt leikelandskap». Eit forslag som skal skape universelt tilgjengelege gangvegar som knyt Skuleparken saman, samstundes som brattare snarvegar gjer skulevegen til ein leik gjennom
spanande fysiske utfordringar.
Det er også eit ønskje om å fylle området med varierte leikeområde, til dømes skatepark og terrengløype og gode opphaldsplassar – i tillegg til å nytte taket på nybygg for 1.–3. klasse som ein del av uteanlegget.
– Vi har kombinert kontrastane mellom dei litt urbane, spreke og fargesterke og det organiske, seier Siri Anette Myklebust.
«Flyt»
Trondheim-baserte Løvetanna Landskap, representert ved landskapsarkitekt Astrid Kjølen, har valt å kalle sitt forslag for «Flyt».
– Forslaget sitt hovudgrep er å få området til å «flyte» betre enn i dag, ved å forme terrenget og la det bukte seg frå aust til vest, fjerne gjerda, og tilverke den lange muren slik at den blir ei klatre- og hinderløype, samle regnvatnet frå tak og dekke og la det renne synleg gjennom parken – i tillegg til å knyte saman heile området med ein sti som slynger seg frå øvst til nedst, seier Kjølen.
På same måte som Norconsult ønskjer Løvetanna å ta vare på den flotte skogen i aust, men samstundes altså ta vare på muren, som dei vil gjere til ein overgang med klatre- og balanseutfordringar.
Ein kan sjå fleire illustrasjonar og bilete på Ulstein kommune sine heimesider.
