Ein person død etter ulukke i Eiksundtunnelen

Eiksundtunnelen er opna for normal ferdsel att, etter å ha vore stengt sidan dødsulukka tidleg måndag morgon.
Nyhende

Ein person er død, etter trafikululukka i Eiksundtunnelen natt til måndag:



Ifølgje Sunnmørsposten er det ein mann som mista livet.

Ulukka skjedde i 04.30-tida, og operasjonsleiar i politiet, Arild Reite, fortel at det ikkje var vitne til ulukka.

- Det var andre trafikantar som kom til og oppdaga at det hadde skjedd ei ulukke, fortel han.

Krimteknikarar frå politiet og ulukkesgruppa i Statens Vegvesen var på staden måndag for å undersøkje ulukka.

Arild Reite er operasjonsleiar i Møre og Romsdal politidistrikt.  Foto: Politiet

 

Etter det Vikebladet Vestposten forstår skjedde ulukka på Ørstasida, like etter botnen av den nesten åtte kilometer lange tunnelen.

Det var ein person i bilen og vedkomande er død.

Den døde var måndag morgon ikkje identifisert.

Politiet er på staden og gjer undersøkingar.

- Det er vanskeleg å seie kor lenge tunnelen blir stengd, men det vil truleg gå nokre timar, seier Arild Reite.

Ifølgje Møre-Nytt vart sjåføren sitjande fastklemt i bilen etter å ha krasja i tunnelveggen.

Omkøyring er skilta

Då Vikebladet Vestposten var ved tunnelopninga på Eiksundsida like etter klokka 06.00, var det lite trafikk der.

Ein bom og raude, blinkande lys fortalde om stenginga.

I tillegg stod Jostein Hånes frå Hareid og Ulstein Brannvesen ved tunnelopninga og informerte bilistane som ikkje hadde fått med seg at tunnelen er stengd.

Jostein Hånes i Hareid og Ulstein Brannvesen  Foto: Linda Eikrem

- Tunnelen blir nok stengd i fleire timar, sa han til eit titals sjåførar, som alle valde å snu bilen og køyre derifrå.

Alternative ruter for den som til sømes skulle til Ørsta/Volda vart via ferjesambanda Hareid-Sulesund, Årvik-Koparnes og Solevåg- Festøy.

Reisande fekk også informasjon om tunnelstenginga gjennom eit lysskilt like etter Hasundkrysset. I tillegg stod det folk frå vegvesenet like etter rundkøyringa i Garneskrysset og informerte bilistar.