Leiaren:

Hødd klarer å få fram eit engasjement andre lag og organisasjonar berre kan drøyme om

Nyhende

Heldigvis er fotballsesongen snart i gang: om fire veker spelar Hødd borte mot Fredrikstad i serieopninga. Det er nok mange som gler seg til snart å kunne feste blikket på dei sportslege prestasjonane i klubben.

For det var noko vemodig over årsmøtet i klubben tysdag denne veka. Styreleiarvervet i fotballgruppa vart avgjort med éi røyst. I storsalen på Høddvollhuset vart det meir enn tydeleg at klubben er splitta i to. Det er ikkje lenger berre ein snakkis i bygda at det er minst to leirar i Hødd, for røysteresultatet 50–49 kan ikkje forklarast på noko anna vis.

«Verre resultat kunne knapt Hødd ha fått», skreiv kommentator i Sunnmørsposten, Helge Skuseth. «No må noko gjerast for å få kreftene i klubben til å trekke i same retning», kommenterte vår eigen sportsjournalist, Andreas Bjerknes. Begge har sjølvsagt rett: det blir ei kjempeutfordring for klubben å gå vidare i samla flokk. Det er eit arbeid vi håper fotballstyret er i gang med allereie. For klubben har ikkje råd til å miste støtte og engasjement frå dei som gjekk tapande ut av røystinga om leiarvervet.

Men i tillegg til eit slags vemod, var det også noko vakkert over det som skjedde i storsalen tysdagskvelden. Salen var full, det var ikkje nok stolar til alle. Årsmøtet mobiliserte engasjerte høddarar i alle aldrar, og mange tok ordet. Det var demokrati i praksis. «Viss nokon vil stille som motkandidat til meg, er det fair enough», sa Ivar Morten Normark til Vikebladet Vestposten etter det årlege møtet i klubben. 99 personar brukte retten til å stemme. Det er mange, sjølv i Hødd. Og duellen blei «fair».

Og eitt er i alle fall sikkert: Hødd klarer å få fram eit engasjement andre lag og organisasjonar berre kan drøyme om.