Anette Hoff og Nils Ole Oftebro til Herøyspele

Nils Ole Oftebro som Ragnar Herøyhovding med f.v. Heidi Ruud Ellingsen og Hedvig Garshol. 

Nyhende

Dei profilerte skodespelarane Anette Hoff og Nils Ole Oftebro har lagt planar for sommaren og ynskjer seg blant anna tilbake til Herøyspelet «Kongens Ring» og den salte sjølufta her på Møre.

Med si lange erfaring frå scenekunsten har dei alltid med seg noko ekstra inn i rollene som Kjerring Bråte og Ragnar Herøyhovding.

-Vi gler oss veldig over at dei kjem og ynskjer dei hjarteleg velkomne. Dei ser også fram til ein ny sesong og gjensyn med folket her i vest.

Regissør Gerald Pettersen jobbar no for fullt med å få på plass hovudrollene til årets spel, så det vert nok fleire avsløringar i tida som kjem.

På nyåret er det alltid stor pågang frå nyutdanna og meir erfarne skodespelarar som ynskjer seg ei rolle i spelet.

Herøyspelet har mange profesjonelle skodespelarar som har vore trufast med i ei årrekkje, og mest truleg vil vi også i år sjå igjen kjente og kjære andlet frå tidligare. 

Blir du med?
Herøyspelet inviterer kvart år folket til å vere med som aktørar på scena og funksjonærar i dei  viktige gruppene som bidreg til at spelhelga vert eit velsmurt og vellukka arrangement for dei tilreisande og publikum.

-Påmeldinga tok til i midten av februar, og det er kjekt å sjå at mange allereie har meldt seg på, seier Nærø.

Han påpeiker at det er mange funksjonar som skal fyllast under eit slikt arrangement, og nemner blant anna transport, parkerings- og kaivakter, billettsal, effektsal, matsal og kjøkken, sminke, kostyme og teknisk avdeling i tillegg til aktørar i spelet.

- Har du anledning og lyst til å vere med på ein av dei største og kjekkaste kulturdugnadane i vår region er du hjarteleg velkomen til å vere med.

Det er fortsatt mange ledige plassar og eg vil derfor oppmode alle som har lyst og som har ledig fyrste helga i juli til å nytte påmeldingsskjemaet på heimesida til Herøyspelet og melde seg på.

Herøyspelkoret søkjer songarar.
Har koret ditt tatt ferie i juli, må du gjerne vere med i Herøyspelkoret. Vi står overfor eit generasjonsskifte i koret og søkjer derfor fleire koristar og songarar. Saman med orkesteret har koret ei sentral rolle i Herøyspelet «Kongens Ring».

Musikk og song er eit viktig element for framdrifta i spelet og bitt saman handlinga med flotte korverk, komponert av Svein Møller.

- Vi er på utkikk etter menn og kvinner, tenorar, bassar, altar og sopranar. Det er veldig kjærkome med fleire mannlege songarar i koret, derfor vil eg spesielt ynskje tenorar og bassar hjarteleg velkomne til å bli med, saman med fleire songglade kvinner også, sjølvsagt.

Skjema for påmelding er å finne på heimesida til Herøyspelet. Vi gler oss fram mot sommarens Herøyspel og vonar at det også i år vert eit vellukka arrangement, avsluttar Nærø.