21 år gamle Mago Kudosov frå Ulstein Taekwondoklubb er Møre og Romsdals kandidat til prisen Årets eldsjel som blir delt ut under Idrettsgallaen i januar. Trenaren blir også fakkelberar under opningsseremonien til Ungdoms-OL på Lillehammer.

- Dette hadde eg verkeleg ikkje rekna med, seier Mago Kudosov.

Han visste at han var nominert til utmerkinga årets unge eldsjel i Møre og Romsdal, men at han skulle gå av med sigeren hadde han ikkje tru på.

- Dette er ein stor dag for meg, vedgår 21-åringen, som i snitt brukar 15-16 timar i veka på å trene unge taekwondo-entusiastar i Ulsteinvik.

På dagtid studerer han til byggingeniør ved Høgskulen i Ålesund.

Frå Tsjetsjenia som 8-åring

Mago Kudosov og familien hans kom som flyktningar frå Tsjetsjenia då Mago var 8 år gammal. Det første året budde dei på Sunndalsøra, men frå 10-årsalderen har dei budd i Ulsteinvik.

- Far min var elev ved kompetansesenteret og vart kjend med ei kvinne som hadde ein mann som var trenar for taekwondoklubben. Både pappa og eg begynte å gå på treningane, og sidan har eg vore her, smiler Mago Kudosov.

Onsdag kveld møtte Magne Krumsvik, styremedlem i Møre og Romsdal idrettskrets opp på treninga til Ulstein Taekwondoklubb. Med seg hadde han både blomster og rosande ord.

Først i neste veke blir det klart om Mago Kudosov når finaleheatet til den gjeve prisen. Då skal juryen overraske dei fem finalistane til Årets eldsjel blant de 19 fylkeskandidatane som kjem frå heile landet.

Som fylkesvinnar er Kudosov uansett sikra ei spennande rolle i Ungdoms-OL. Han blir fakkelberar under opningsseremonien til Ungdoms-OL på Lillehammer i februar. Saman med 18 andre fylkesvinnarar skal han overrekke elden til H.K.H Prinsesse Ingrid Alexandra i Lysgårdsbakkane 12. februar.

Kudosov er trenar for unge taekwondoutøvarar i Ulsteinvik. I nominasjonen står det blant anna: «Kvar einaste ettermiddag har han treningar for barn i Ulsteinvik. I tillegg bidreg han som frivillig trenar i helgene. Nyleg arrangerte han også Taekwondo barnefestival. Mago er eineståande og borna elskar han».

Det er Møre og Romsdal idrettskrets som har innstilt Kudosov som fylkesvinnar i konkurransen.

– Han har vore svært viktig for å få opp aktivitetsnivået i klubben dei siste åra. Mago bidreg til å utvikle både klubben og utøvarane sine ferdigheiter. For å få til dette har han henta inn kjente og dyktige trenere frå inn og utland. Dette er verkeleg ein gut som brenn for idretten og klubben sin, seier Siri Ask Fredriksen, konstituert organisasjonssjef i Møre og Romsdal idrettskrets.

Som fylkesvinnar til prisen Årets eldsjel vil Kudosov bli hylla under Fakkelturneen til Lillehammer 2016. Det skjer når OL-elden til Molde 20. januar.