Hilde Marte Garnes er dotter til Odd Idar Garnes frå Ulsteinvik og Ragnhild Kriken Garnes frå Volda. Hilde Marte Garnes har dermed ei stor slekt i Volda og Ørsta. Hilde Marte og Akshat Gupta er busette i Mumbai, India, der Hilde Marte jobbar som smykkedesignar. Sjølve giftarmålet skjer i Mumbai, som har om lag 17 millionar innbyggjarar. At gjestene frå nord får vere med på ei bryllaupsfeiring dei seint vil gløyme er det liten tvil om. Bryllaupsfesten vil vare i tre dagar til ende, 3. 4. og 5. april, og inkluderer også ei reise litt lenger nord i landet, der bestefar til Akshat Gupta kjem frå. Akshat og Hilde Marte møtte kvarandre i Singapore i 1996, der dei begge studerte ein periode. I eit intervjue med Vikebladet Vestposten 23. desember i fjor røper paret at dei har vore kjærastar sidan 1998. Dei bur altså no i Mumbai, men har feira kvar jul i Ulsteinvik. Den første jula vart han sjokkert over den norske delikatessa rakfisk. Det lukta så fælt at han vart kvalm. I same intervjuet kjem det fram at Akshat kallar Ulsteinvik for "Cake town". Dette fordi han vart så forundra over alle dei 40 kakene som vart sett på bordet i eit bryllaup der han var gjest. Men det spørst om ikkje dei norske gjestene finn eitt og anna å undre seg over når dei blir gjester i eit indisk bryllaup også. Dei fleste gjestene frå Sunnmøre reiser til India 31. mars.