Klokka 22.15 tysdag kveld fekk politiet melding om ein bustadbrann på Dimnøya, i nærleiken av Spar-butikken på Straumane.
Meldinga gjekk ut på at det brann i ein firemannsbustad, men det synte seg at brannen var avgrensa til badet i den eine leiligheita.
Då politiet kom til staden blei ein mann i 50-åra pågripen for eldpåsetjing. Mannen vedgår forholdet.
I tillegg til skadene på badet, har delar av bustaden røykskader. Den pågripne mannen vart undersøkt for røykskader av ambulansepersonellet på staden.
50-åringen er frakta til sentralarresten i Ålesund, og saka vert etterforska av Ulstein og Hareid lensmannskontor.
