Ein julidag i sommar hadde ein mann som er busett på Hareid fest heime hos seg sjølv. Det vart drukke alkohol på festen, blant anna øl. Etter kvart begynte festlyden å "shotte" Sambucca.

Etter ei stund, utan at mannen kan gjere greie for kvifor, kom han på at han skulle køyre bil.

Etter 200-300 meter snudde han bilen, men rett før ein fartsdump køyrde han inn i eit tre. Mannen hugsar ikkje kva som vart gjort med bilen i etterkant av utforkøyringa, og han hugsar heller ikkje om der var passasjerar i bilen.

Då politiet kom til staden nekta han for å ha køyrt bilen, dette fordi han ikkje hugsar kva som skjedde.

Ein blås i politiet sitt alkoholutandingsapparat viste at han var påverka av alkohol.

Då han vart edru neste dag, ringde han politiet og tilstod.

Medan han framleis var sikta for promillekøyring var han ein kveld i Ulsteinvik. Der oppdaga politiet at han stod og urinerte på veggen til Sparebanken Møre. Då politiet konfronterte han med dette, erklærte han kva han hadde gjort, men forklara han at han gjorde det fordi dokøa var lang.

Til Sunnmøre tingrett har han sagt at han er skjemd over begge lovbrota, og at han etter episoden med urinering i Ulsteinvik ikkje har drukke alkohol i det heile.

Mannen er for tida utan fast arbeid.

Straffa er sett til fengsel i 21 dagar, med ei prøvetid på to år. Han er i tillegg dømt til å betale ei bot på 10.000 kroner, subsidiært fengsel i 15 dagar viss han ikkje klarer å betale bota.

Han må også opp til full ny førarprøve for å få att sertifikatet.