Dei utsøkte tenorane held konsert i Hareidshallen torsdag 17. oktober.
Hareidsstemna nærmar seg. Opninga blir laurdag 12. oktober og stemnet varer til og med søndag 20. oktober. Stemneleiar Hans Otto Øvrelid lovar hendingsrike dagar.
Hovudkonserten i år blir altså med Nordic Tenors. Dei kjem med showet “An evening with Nordic Tenors” torsdag 17. oktober.
Med i Nordic Tenors er Jan-Tore Saltnes, Roald Haarr og Sveinung Hølmebakk. Dei stod på scena i lag for første gong i 2003, og har sidan turnert landet rundt med song, humor, dans og musikalske overraskingar.
KONGELEG HUMOR
Gjennombrotet kom då dei fekk Komiprisen som Årets Nykomar i 2006. Seinare har dei vore kongelege toastmasterar for Kong Harald i 2007, og dei opna den nye operaen i Bjørvika i 2008.
Hausten 2012 hadde dei premieren på det tredje showet sitt, og det er dette dei kjem til Hareidsstemna med 17. oktober.
Øvrelid lovar at publikum denne kvelden skal få oppleve ei både humoristisk og herleg framsyning. Ho byr på alt frå vakker operasong til Beatles og ellevill jodling.
Billettar er alt å få kjøpt via nettstaden til Hareidsstemna, ved Eiken Libris i Ulsteinvik og på Servicetorget ved Hareid rådhus.
UNGDOMSKONSERT FREDAG
Tradisjonen har vore at hovudkonserten under Hareidsstemna er lagt til fredagskvelden. På grunn av turnélista til Nordic Tenors blir det altså torsdag i år. I staden vil det bli ungdomskonsert på fredagskvelden.
Stemneleiar Øvrelid opplyser at det meste av programmet til Har-eidsstemna no er i boks, og at det vil kome mange programoverraskingar framover.