Om haldningane til førstekandidatane til partia er retningsgjevande, vil Hafast ha brei støtte i Møre-benken på begge sider av det ideologiske skiljet etter valet.
Vikebladet Vestposten har kartlagt E39-standpunkta til førstekandidatane frå dei sju partia som i dag er inne på Stortinget.
Resultatet viser ein klar tendens. Seks kanditatar meiner at Hareid fastlandssamband bør veljast framfor Festøy fastlandssamband. Ein kandidat meiner Fefast er det beste valet.
Styreleiaren i Fefast: - Håpar faglege argument vinn fram
Alle kandidatane frå opposisjonspartia stiller seg bak Hafast.
– Hafast er den løysinga som gir størst effekt for næringslivet og innbyggjarane, og vil bidra til å knyte saman den maritime regionen på Søre Sunnmøre med Ålesund. Det vil også sikre eit godt ferjefritt samband for gjennomgangstrafikken, seier Høgre-kandidat Helge Orten. Pål Farstad (V) er samd.
– Det er denne løysinga som vil gi størst effekt for å knyte saman Søre Sunnmøre og Ålesundsregionen til ein robust og relevant felles bu-, service- og arbeidsmarknadsregion, hevdar han.
Harald Tom Nesvik (Frp) og Rigmor Andersen Eide (KrF) stiller seg også bak Hafast. Eide meiner vedtaket i fylkestinget for Hafast spelar ei stor rolle.
– Her meiner eg vi må stå samla kring fylkestingsvedtaket. Når det er sagt har KrF sentralt ikkje konkludert i traséval. Det som er sikkert er at eit regjeringsskifte vil få fortgang i gjennomføringa av heile E39, hevdar Eide.
To av dei raudgrøne ønskjer Hafast
Førstekandidatane frå to av regjeringspartia meiner Hafast er det beste alternativet for ferjefri E39.
Arbeidarpartiet sentralt har ikkje tatt stilling til trasévalet. Stortingsrepresentant og førstekandidat i Møre og Romsdal, Else-May Botten, meiner alternativet om Hareidlandet er det beste.
– Eg meiner vi i Ap skal gå for Hafast.
Jenny Klinge frå Senterpartiet meiner stortingspolitikarane må halde seg til vedtaket i fylkestinget, men synest også Hafast er det beste alternativet totalt sett.
– Fastlandssamband skal korte ned vegen, men også byggje sterkare bu- og arbeidsmarknadsregionar. Vektinga av desse omsyna avgjer til slutt traséval. Når det gjeld valet av Hafast, er det siste som er sterkast vektlagt.
Opedal ønskjer opprusting framfor ferjefri veg
Ingrid Opedal, som er på førsteplass for Sosialistisk Venstreparti i Møre og Romsdal, meiner ferjefri E39 ikkje bør prioriterast i det heile.
– Gul midstripe er viktigare enn ferjefri E39. Eg og SV vil, med utgangspunkt i dei store utfordringane i samferdslesektoren, prioritere breiare, tryggare og rassikre vegar og hyppigare ferjeavgangar framfor nye, dyre ferjeavløysingsprosjekt, seier Opedal.
– Dersom det skal byggjast eit ferjeavløysingsprosjekt, går eg inn for Fefast. Hafast vert etter mitt syn ein omveg, og den djupe Eiksundtunnelen vert ei unødig barriere for stamvegtrafikken.
Dagleg leiar i Hafast: - Som forventa
Vil helst ha indre alternativ i Nordfjord
Vi spurte også kva alternativ kandidatane helst vil ha realisert for E39 i Nordfjord.
Her er det to traséval som kjempar mot kvarandre: Eit indre alternativ frå Byrkjelo til Volda via Stryn og Kvivsvegen, og eit midtre alternativ med bru over Lote-Anda og ny veg gjennom Stigedalen til Volda. I tillegg er det ein del støtte foreit forslag som kombinerer bru Lote-Anda med E39 om Kvivsvegen (“S-løysinga”).
Kandidatane frå Venstre, Framstegspartiet og Høgre meiner alle at indre alternativ bør veljast.
– Fylkestinget i Møre og Romsdal har gått inn for indre trasé. Eg m, einer det løpet vart lagt då Kvivsvegen vart bygd og vart ein del av E39. Med det som utgangspunkt er det naturleg å vidare E39 etter indre linje, seier Helge Orten.
Jenny Klinge i Senterpartiet meiner fortgang i prosjektet er viktigare enn trasévalet.
– Møre og Romsdal kan leve med begge løysingane, så det viktige no er at det blir teke ei avgjerd snarast råd. Eg vil halde fram med å presse på for at avgjerda skal takast før valet.
– Det er avgjerande for gjennomføringa av E39 at Sogn og Fjordane raskast mogleg blir einige om traséval, meiner Andersen Eide i KrF.
– Dette er ei rimeleg heit potet. Om den blir hausta før valet veit eg ikkje. Sett ut frå våre interesser er indre linje best. Det er eit billegare prosjekt og vil kunne gjennomførast raskare slik vi ser det, seier Else-May Botten. Ap i Møre og Romsdal har gjort vedtak om at dei ønskjer indre trasé.
SV går for midtre trasé
Opedal skil seg frå politikarkollegaene sine også når det gjeld vegen gjennom Nordfjord.
– Eg stiller meg bak synet til fylkeslaget i Sogn og Fjordane, og også SV sentralt, og går for midtre linje. Sjølv har eg alltid sett denne linja som den naturlege nord-sør-stamvegen, seier Opedal.
Ho meiner S-løysinga (E39 over Lote- Anda og derifrå tilbake til Kvivsvegen, red. merk.) kan vere eit alternativ til midtre trasé. Opedal har også nokre lovord å kome med om Kvivsvegen.
– Kviven er eit fint samband for regionen vår og for vegsambandet austover, og vegen mellom Stryn og Byrkjelo er ein av dei mange som i høgste grad treng å rustast opp.