Hareid-damene starta sesongen med tap, men står no med to strake sigrar i 3.-divisjon. Sist var det Blindheim/Fortuna som blei slått, og måndag kveld kom sesongens første siger heime på Hareidsmyrane.
Victoria Røren gav heimelaget leiinga etter 30 minutt, og berre fem minutt seinare dobla Hanna Holstad Grimstad for heimelaget.
Over i den andre omgangen reduserte Brattvåg ved Vibeke Flem etter 64 minutt, men Hareid slo kjapt tilbake og Victoria Røren sette inn sitt andre mål for kvelden berre tre minutt etter reduseringa.
Det målet skulle vise seg å bli avgjerande, for ti minutt før slutt reduserte Vibeke Flem endå ein gong. Hareid heldt leiinga heilt inn, og klatra opp til ein andreplass på tabellen etter sine tre første kampar, med like mange poeng som Volda på førsteplass.
Neste kamp for Hareid er ein skikkeleg godbit. Neste onsdag er det nemleg lokaloppgjer på "fotballens festdag" 16. mai, då Hødd inviterer til fotballfest mot Hareid på Høddvoll.