Hødd sitt J19-lag er klare for semifinale i A-sluttspelet under Norway Cup etter å ha slått Raufoss 1-0 i kvartfinalen.
I det som var ein jamn kamp på Ekebergsletta skulle det ta lang tid før den avgjerande scoringa kom, men med litt medvind i ryggen skulle det ordne seg for Hødd-jentene.
Anna Nerland Aahjem skrudde nemleg ein corner direkte i mål til 1-0 fire minutt før full tid. Raufoss klarte ikkje å slå tilbake og dermed kunne Hødd-jentene juble for avansement til semifinale.
Det betyr at det blir endå ein kamp for J19-laget fredag. Semifinalen går 19.30 fredag kveld og der møter Hødd vinnaren av kampen mellom Nordhordland og Stord.
