Så langt i NM har Hødd sitt G16-lag gjort det godt, og har slått ut både Clausenengen og Nardo på vegen til den tredje runda. Søndag får dei moglegheita til å ta seg vidare til den nasjonale delen av NM, som hittil har vore regional.

Skal dei klare det må dei slo ut sjølvaste Rosenborg.

Trønderane har valsa seg vidare fram til no, og har ein målskilnad på 29-0 på dei to kampane dei har spelt i årets regionale NM. Mellom anna vart Volda 16 mål for små, som elles ligg greitt med i 1.-divisjon på Sunnmøre.

- Eit sterkt lag

Hødd-trenar Harald Rise er balansert når han får spørsmål om Hødd kan ta seg vidare, men vedgår at det blir ei tøff nøtt å knekke.

- Rosenborg er eit veldig sterkt lag, for å seie det litt forsiktig. Sidan dei stiller med gutelaget i juniorserien, for å matche dei betre, er det liten tvil om at dette er eit av dei beste laga i landet. Dei er vel også favorittar til å vinne heile turneringa, varslar han.

Samtidig ser Rise fram til kampen, slik at han får testa nivået på både sitt eige og andres lag i landet.

- Det blir spanande å sjå. Vi har ofte ein tendens til å løfte spelet vårt mot gode lag, så det skal bli interessant å sjå kor lista ligg.

Normal opplading

Sjølv om det er eit knallsterkt lag som kjem på besøk søndag, er det ikkje nokon spesielle tiltak som blir gjort inn mot oppgjeret. Rise har likevel ikkje gjort seg opp ei klar meining om korleis han vil angripe kampen.

- På grunn av at nokre har spelt juniorkampar så må vi sjå litt an. Rosenborg har ingen svake ledd, så det er gå konkrete svakheiter som vi kan utnytte, seier trenaren.

Når alt kjem til alt så er det ikkje berre om å vinne som tel for Rise.

- Dette er ein viktig del av utviklinga til gutane, så det blir ei god læring også.

- Kan Hødd ta seg vidare til neste runde, Harald?

- Alt er mogleg. Det fekk vi bevis på i fjor når A-laget vann på Ullevaal, smilar trenaren.