I fjor tok Hødd berre tre poeng på dei åtte første seriekampane. Seks poeng etter tre rundar gjer utgangspunktet for det som skal skje i år mykje betre.

– Kva har de gjort rett denne sesonginnleiinga kontra den førre, Steffen Moltu?

– Vi har blitt tryggare, og det er det nok fleire grunnar til. Mange av oss begynner å få ein del erfaring frå Adeccoligaen. Vi har jo mista nokre spelarar frå i fjor, men mesteparten av grunnstammen er her framleis. Sjølvtillit er også ein nøkkel. Det gjekk opp og ned i fjor, men vi avslutta med eit brak. I tillegg har vi internt fokusert mykje på å opne sesongen betre enn i fjor, fortel Moltu.

Og legg til:

– Men hugs at vi berre har spelt tre kampar. Taper vi dei fem neste har vi ikkje kome særleg lengre enn på same tid i fjor. Uansett er det alltid viktig å starte godt. Får vi flyt er det alltid mykje lettare å halde det gåande.

Få baklengs

Hødd har inkludert cupkampar sleppt inn berre to mål på dei fire siste kampane. Baklengsmålet mot HamKam kom på ei feilaktig dømt straffe. Spørsmålet då blir om Hødd har blitt betre defensivt sidan i fjor?

– Vi har stått fram solide defensivt, men det er ikkje berre oss der bak si forteneste. Heile laget jobbar godt. Det er også gledeleg at det ser bra ut offensivt. Vi har ikkje vore spesielt effektive, men likevel scora ein del mål, seier Steffen Moltu.

Svak bortestatistikk

Akkurat no verkar Hødd å vere i bra form. Men søndag er det bortekamp mot Strømmen. Og var det noko Hødd ikkje fekk til i fjor var det bortekampar i serien. 1-3-11 og 15–35 i målskilnad er ikkje rare statistikken å ramme inn.

– I fjor fekk vi ikkje til kombinasjonen av å både vere kyniske defensivt og tørre å spele ball framover på bortebane i serien. Det er vanskeleg å seie kva fasiten er på å spele ein gode bortekampar, men står vi fram like solide som mot HamKam heime skal det vere godt nok til å gjere det godt også borte, meiner Steffen Moltu.

– Nokre av lagkameratane dine meinte de vart for feige i sluttminutta mot Fredrikstad då de tapte på overtid. Er du einig?

– Det var nok litt for mykje dunking for å ro i land 2–2. Det skal ikkje vere nødvendig å skjerme ballen ute ved cornerflagget ti minutt før slutt i slike kampar. Då spreier det seg ei usikkerheit i laget. Samtidig hadde det vore uhyre godt og viktig om vi klarte eitt poeng i Fredrikstad, som vi var nær ved å få til, meiner Moltu.

Strømmen – Hødd startar klokka 18.00 søndag. Du følgjer som vanleg kampen live på vikebladet.no.

Les også:

* Hødd - Stabæk 1-0* Hødd - HamKam 2-1* Fredrikstad - Hødd 3-2

* Åsane - Hødd 0-1* Brattvåg - Hødd 1-4