– Det er ein skikkeleg god måndag for oss alle her i dag. Både med tanke på dagen i går og elles i helga. Det trur eg vi treng litt tid på å fordøye. Men det er ei fantastisk god kjensle, fortel sportssjef André Nevstad til Vikebladet Vestposten på Høddvoll måndag.
Nevstad legg til at dei ikkje har hatt tid til å gjere så mykje på klubbhuset, for utan å snakke med pressa som er heilt naturleg etter ei slik hending.
– Eg har sagt til dei tilsette at denne dagen kan dei bruke til cupfinalen og etterarbeid. Så må vi nok sakte men sikkert sjå opp og fram mot det som skal skje i 2013. Det ligg mykje godt arbeid føre oss no. Det er ingen tvil om det, slår Nevstad fast.
På spørsmål om kva han synst om folket sitt engasjement opp mot cupfinalehelga, svarar Nevstad at han er mektig imponert.
– Eg har vore rørt og det har gått frysningar nedover ryggen fleire gongar. Så mange blå. Det engasjementet og den patriotismen som har vore denne helga er heilt fantastisk. Også avslutninga på Sjøborg som Ulstein kommune inviterte oss til. Vi set veldig stor pris på dei mange supporterane som møtte fram også. Det sat ei flott ramme rundt arrangementet, smiler Nevstad.
Cupsiger gir inntekt
Sjølv om gjennomføring av cupfinalen med tilhøyrande arrangement medfører store kostnader, har André Nevstad trua på at dei kjem godt ut av dei heile også økonomisk.
Erfaringsmessig medfører cupgull både auka sponsorinntekter og inntekter frå til dømes sal av supportarutstyr. I tillegg kjem billettinntekter og medieinntekter frå finalen frå cupfinalen, som Hødd deler med Tromsø IL og Norges Fotballforbund.
– Vi har ikkje no noko endeleg oversikt over kva dette vil koste oss. Men vi veit at det å gjere det godt i cupen – og vinne cupen – gir gode inntekter til klubben. Men dette er noko vi dei neste vekene får meir innsikt i. Så det vert spennande å sjå, avsluttar Nevstad.
Overrekte blomar
– Eg tykkjer det er heilt nødvendig å gje blomar i dag. Det er ein stor dag for Hødd og Ulstein kommune si historie. Hødd er 93 år. Og då var det på tide det skjedde noko formidabelt. Som i går – då dei vann cupfinalen, seier Berset, som legg til at hendinga var stor for Ulstein kommune, men enda større for Hødd.
Og ordføraren var sjølvsagt på kampen. I tillegg var han så heldig å få sitje på kongetribuna.
– Eg hadde fantastisk utsikt. Kampen var nervepirrande, og eg beit naglar heile tida, vedgår ordføraren.
– Kva trur du resultatet av kampen betyr for kommunen med Hødd i spissen?
– Dette har eg sagt mange gongar før. Hødd er ei veldig god merkevare for Ulstein. I lange tradisjonar med kultur og historie, har Hødd utmerkt seg heile tida. Men no har vi fått mange andre merkevarer i kommunen som blant anna Ulstein Group, Rolls-Royce og Kleven. Men likevel er Hødd vår aller beste merkevare, som no har styrka sin posisjon gjennom sundagens kamp, avsluttar Berset.
