Trass i at Hareid har spelt to treningskampar i oppkøyringa til haustsesongen, trur oppmann Einar Orten Trovåg det kan ta nokre kampar før laget nærmar seg toppnivået igjen.

– Frammøtet på treningane i sommar har nokre veker vore veldig bra, og vi har fått spelt to treningskampar. Men fleire har slite med skadar og sjukdom, samtidig som andre har flytta eller slutta. Og dei nye som kjem inn treng nok litt tid på å kome tilbake i god gammal form, trur Trovåg.

Oppmannen understrekar likevel at han er optimistisk framfor fredagens haustopning heime mot Blindheim.

Fem spelarar ut

Hareid har anten har mista eller kjem til å miste desse spelarane i sommar: Kim-Tore Husøy (Oslo), Martin Mork Breivik (Hødd), Joachim Røyset (Oslo), Nikolai Røyset (Canada + kneskadd) og Ørjan Engen Grimstad (Trondheim). I tillegg blir Venthan Ketheeswaran vekke mesteparten av hausten grunna reise til Canada.

Joachim Røyset skal spele dei tre første haustkampane for klubben før han reiser. Også Grimstad er aktuell til nokre kampar utover hausten. Kapteinen har vore sidelinja med sjukdom heile sommaren, men er no tilbake i trening.

Heimkomne gutar

På plussida er Robin Jackson Indreflø, Alexander Nevstad og Tore Bjørge Mjønes tilbake i stallen etter opphald andre stader i landet. Indreflø er for tida skadd, medan Nevstad per tysdag ikkje er tilbake i trening enno. Mjønes blir Hareid-spelar fram til om lag 11. september, då han må tilbake til Trondheim for å studere vidare.

Med til England

Troppen mot Blindheim fredag vil truleg likne på den som spelte treningskampen mot Vartdal måndag. Både Joachim Moldskred, Christer Adrian Mork og Thor-Ove Brekke er vekke denne veka. Ettersom Brekke er i opptrening etter ein alvorleg kneskade, hadde han uansett ikkje vore aktuell til serieopninga.

Kor vidt Audun Øvrelid spelar fredag var ikkje klart då vi snakka med Trovåg tysdag. Ungguten har denne veka vore med Hødd sitt rekruttlag på treningsleir, og det spørst når dei kjem igjen frå England.

På si side har Ola Kalvø Vattøy vore i utlandet heile sommaren, men har ifølgje det Trovåg kjenner til trena godt. Lars Andreas Dahlen Folkestad var ikkje med i nokon av dei to treningskampane, men skal vere klar til dyst.

Øvre halvdel

I ein veldig jamn 4.-divisjon ligg Hareid på 4.-plass før haustsesongen.

– Kva er så lagets målsetjing for haustsesongen?

– Vi sa vel før vårsesongen at vi hadde eit mål om øvre halvdel i år. Eg ser ingen grunn til å endre på det. Klart, ein spelar som Kimmen (Husøy) let seg ikkje erstatte over natta. Men vi har mykje kvalitet igjen i stallen, både ungt og gammalt, sjølv om stallen gjerne kunne ha vore større. Unngår vi for mange skadar og karantenar utover hausten, samtidig som vi får trena godt, er det heller ikkje umogleg å ende på topp fire, seier ein optimistisk Einar Orten Trovåg.