Det vart ein noko spesiell handballkamp i Ulsteinhallen då Hødd1 og Hødd2 møttest til eit superlokalderby søndag. Og det var førstelaget som kom best i gong, og tok kjapt leiinga.

Men som mot Sykkylven/Stranda dagen før, sleit Hødd1 med å få alt til å stemme i den første omgangen.

- Det var litt som i går, den første omgangen var ikkje så imponerande, men den andre omgangen var betre, seier Hødd1s trenar Stasys Galdikas.

Tomålsleiing

For Hødd2 viste at dei slettes ikkje ville gi seg utan kamp. Sjølv om Hødd1, som var mørkeblå for høvet, hadde leiinga heldt det lyseblå 2.-laget godt følgje før pause.

Med ti minutt på klokka leia Hødd1 knipent 5-3, før dei rykka ifrå til 12-6. Mot slutten av den første omgangen kom derimot Hødd2 sterkt tilbake og korta inn forspranget til 14-12 halvvegs.

Det seier andrelagstrenar Andreas Bjerknes seg nøgd med.

- Vi hadde ei god periode inn mot pause der vi henta inn fire mål. Då avtalte vi at vi skulle gå ut å gjere mykje av det same i starten av andre omgangen, summerer Bjerknes opp.

Personlege feil

Men starten på andre omgang vart ikkje noko god oppleving for Bjerknes og Co. Nokre unødvendige balltap gjorde at Galdikas’ lag kunne kontre inn ei handfull scoringar dei første minutta.

Hødd2 beit tenna saman og pressa på. Ti minutt ut i den andre omgangen var forspranget igjen redusert til tre mål på stillinga 20-17, men så slokna det for dei lyseblå.

For i løpet av det siste kvarteret viste Hødd1 kven som var sjefane, og stoppa ikkje før stillinga var 32-24 – og sikra ein solid åttemålssiger over «rivalane» frå sin eigen klubb.

- Spesielt

Sidan det ikkje er ofte ein møter sine eigne i eit seriespel, seier begge trenarane seg einige i at det var eit noko merkeleg møte dei stod ovanfor denne søndagen.

- Ein ser at Hødd2 er eit lag som er ein god del yngre enn Hødd1, og den erfaringa kjem dei til å vekse mykje på. Det er litt spesielt å møte dei, for vi trenar med dei tre gonger kvar veke – det gjev ein litt ekstra motivasjon til å gjere det så godt som muleg, seier Bjerknes, og får støtte frå Galdikas.

- Eg er veldig nøgd – med begge lag. Dei vart kanskje litt slitne mot slutten, men eg synest at dei blir betre og betre. Om eit halvt år er vi kanskje på det same nivået? Vi får sjå, seier ein diplomatisk Galdikas.

KAMPFAKTA

Hødd1 – Hødd2 (14-12) 32-24

Hødd1: Marie Ulstein, Cecilie Roppen (2), Thea Tafjord (3), Guri Vattøy (3), Caroline Ulstein, Edny Kvalsund Gjuvsland, Marte Åsmo (2), Lindi Galschiødt (2), Ana Tepuric (4), Ronja Abrahamsen (5), Birthe Urke (1), Elisabeth Økland (9)

Hødd2: Ann Kristin Eiken, Eline Fylsvik, Selene Meinseth (3), Astrid Grimstad (5), Charlotte Sundnes (6), Marte Barstad (4), Maren Hofseth (1), Rikke Amundsen (3), Karoline Møller (1), Maria Worren (1), Ingebjørg Oscarsson.