Fredag skriv Østlandets Blad at Follo-trenar Hans-Erik Eriksen skal vere ein av dei aktuelle kandidatane til den ledige jobben som hovudtrenar i Hødd. Sunnmørsposten skriv torsdag kveld på si nettside at Eriksen har vore på besøk på Høddvoll tidlegare, og at han skal tilbake fredag. Det skriv også Østlandets Blad i si fredagsutgåve, men sportssjef og dagleg leiar i Hødd avkreftar at Eriksen skal vere på veg til Høddvoll fredag.

- Nei, vi skal ikkje ha noko besøk i dag. Eg sit i bilen på veg til Oslo, seier Nevstad på telefon.

Sportssjefen vil ikkje gå inn på namn på aktuelle kandidatar til trenarjobben i Hødd, men stadfestar at klubben har snakka med fleire aktuelle kandidatar, at ein har fått gjennomført ei god kartlegging og håpar på ei snarleg avklaring.

Eriksen har sjølv stadfesta til Østlandets Blad at han har vore i dialog med Hødd, og at han ser på klubben som ein aktuell arbeidsgjevar. Han stadfestar også at han har vore på besøk hjå klubben.

- Hødd har kome langt på veldig mykje, og det meste ligg til rette for ytterlegare vekst der, seier Eriksen til Østlandets Blad.

André Nevstad seier til Vikebladet Vestposten at Hødd håpar på å vere klare med den nye trenaren ganske snart.

- Når vi har fått satt eit trenarteam så kan vi også få starta med stallen. Ingenting er klart per i dag, men eg synest vi er bra i rute, fortel Nevstad.

Hans-Erik Eriksen har kontrakt med Follo ut 2015-sesongen. Han skal i utgangspunktet ha frist laurdag til å gje Follo beskjed om han vil halde fram i klubben eller ikkje.

Eriksen har vore trenar i Follo sidan 2009. I sin første sesong i klubben rykte laget opp til 1.-divisjon, og i 2010 tok Follo seg til cupfinalen, som dei tapte mot Strømsgodset. Sidan Eriksen tok over Follo har laget spelt tre sesongar i 1.-divisjon. Denne sesongen rykte laget ned på overtid i siste serierunde, då Jerv utlikna til 2-2 på Ski stadion seks minutt på overtid.