Hødd 1 og Bergsøy 2 møttest onsdag til ein utsett kamp i kvinnenes 4.-divisjon i handball. Laga hadde også møttest ein gong tidlegare denne sesongen, då Hødd 1 vann 18-31 i Herøyhallen.

Dermed var også heimelaget store favorittar i Ulsteinhallen, men starten til Hødd 1 var alt anna enn imponerande. Det var nemleg Bergsøy 2 som tok leiinga, og sjølv om Ana Tepuric utlikna for Hødd, så var det ikkje alt som stemte for dei blåkvite. Bergsøy 2 hadde tydeleg lært av den første kampen mellom laga, og tok ut Elisabeth Økland frå start. Ho scora åtte mål sist laga møttest.

Med frimerke på Økland gjekk det i stå for Hødd sitt angrepsspel i byrjinga av kampen, og etter dei ti første minutta hadde heimelaget så vidt karra seg opp i ei eittmålsleiing på 5-4.

Deretter gjorde Hødd nokre justeringar i måten dei spelte på, og plutseleg byrja det å stemme betre for heimelaget. Frå 5-4 scora Hødd åtte gongar på rad før Bergsøy 2 kom på scoringslista igjen. Då var stillinga plutseleg 13-5 og det kunne sjå ut til at resultetet kunne bli stygt for bortelaget. Dei siste minutta inn mot pause var likevel prega av ein del feil og for dårlege avslutningar frå begge lag, og laga gjekk til pause på 14-5 til Hødd 1.

No hadde Hødd 1 god kontroll på kampen, og det blei aldri fare for at bortelaget skulle gjere det spanande utover i den andre omgangen. Hødd 1 hadde meir fart i beina enn motstandarane sine og kontra inn ein del mål og auka leiinga til 20-8 etter 40 minutt. I den andre omgangen droppa også Bergsøy å legge frimerke på Økland, som dermed fekk større spelerom, og fekk springe inn fleire scoringar.

Bergsøy 2 fekk samstundes angrepsspelet til å sitte betre i den andre omgangen. Der dei i den første omgangen gjorde for mange feil med ballen offensivt, vart det betre fasong utover i den andre omgangen. Etter litt over halvparten av den andre omgangen hadde bortelaget scora fleire mål etter pause enn i løpet av dei 30 minutta før, og laget gav seg ikkje før det låg 15 ballar i nettet bak Hødd-keeperane.

Det var likevel langt frå nok mot Hødd 1, som heldt avstanden til Bergsøy på same nivå som sist. Det blei ikkje fullt så mange scoringar denne gongen, men 28-15 gav ein solid 13-målssiger. Hødd 1 står dermed med fem sigrar på sine første åtte kampar, og er dermed oppe på ein 4.plass på tabellen.

Sundag får laget truleg ein tøffare test heime i Ulsteinhallen. Då kjem nemleg Spjelkavik på besøk, medan Hødd 2 skal spele heime mot Rollon.

Kampfakta:

4.-divisjon handball kvinner:

Hødd 1 - Bergsøy 2 28 - 15 (14-5)

Tominuttarar: Hødd 1 - 2, Bergsøy 2 - 2.

Hødd 1: Marie Ulstein, Ann Kristin Eikrem, Cecilie Roppen, Thea Tafjord (1), Karoline Ulstein (2), Guro Kalvø Vattøy (1), Edny Kvalsund, Elisabeth Økland (9), Ana Tepuric (5), Marte Åsmo (2), Lindi Galschiødt (3), Birthe Urke (5)