For handballentusiastar i Ulsteinvik var det eit tett program i Ulsteinhallen laurdag ettermiddag og kveld. Etter at Hødds J14 lag var ferdigspelte, skulle damelaga til først Hødd 2 og deretter Hødd 1 i aksjon.

Hødd 2 fekk ein pangstart mot serietrear Langevåg 2, som hadde vunne fem av sine sju første kampar denne sesongen, etter at dei tok leiinga i første angrep etter berre 20 sekund. Men gjestene tok fort over kommandoen og leia 5-3 i løpet av dei første fem minutta.

- For mange feil

Sjølv om Hødd hadde ein god periode før halvtid og minska leiinga til Langevåg, leia gjestene komfortabelt 16-10 til pause. Men det var rett og slett ikkje dagen for trenar Andreas Steinnes Bjerknes' lag denne laurdagen. Langevåg utnytta balltap i Hødd-laget, og gav seg ikkje før det stod 20-28 på måltavla.

Sjølv om Bjerknes ikkje har noko å utsetje på innsatsen til damene, seier han at dei straffa dei hardt når det butta imot.

- Vi gjer ein del meir feil, både offensivt og defensivt, i forhold til det vi kan på det beste. Presisjonen i spelet vårt er ikkje heilt på det nivået som vi ønskjer. Spesielt i periodar så blir vi hardt straffa for det, seier voldingen, og legg til at dei sjølve må vere meir effektive.

- Vi har vel ein treffprosent som er under 50 prosent, og det skal ikkje den vere. Vi hadde litt for mange såkalla 100-prosent-sjansar som vi bomma på, og det er slik vi har scora på i dei to kampane føre denne - då har vi også vunne klart. Vi spelte mot eit godt lag i dag, og dei straffa oss hardt for dei feila vi gjer. Det må vi berre lære av, konkluderer han

Jamn 1. omgang

Bjerknes ønskte også å lære endå meir då han sette seg på tribunen for å studere Hødd 1 like etter hans eige lag var ferdige for dagen, ettersom dei to laga møtest til eit "superlokalderby" allereie i søndag.

Stasys Galdikas' lag tok imot Sykkylven/Stranda, som skulle vise seg å vere ei hard nøtt å knekke. Etter ein svært jamn start på kampen, der Hødd jamt og trutt tok leiinga - medan bortelaget utlikna gong på gong - var det såpass jamt at laga gjekk til pause på stillinga 18-18.

- Vi mangla litt energi i starten, men etter ti minutt så kom det seg og vi fekk opp motivasjonen. Då hadde vi det kjekt og spelte på det normale igjen, smiler ein nøgd Galdikas.

Solid margin

For etter kvilen fekk Hødd-trenaren mykje å glede seg over. Også starten på den andre omgangen var jamn, men etter at Hødd gjekk opp i 25-23 ti minutt ut i omgangen såg dei ut til å vere komfortable så å seie heile den andre omgangen.

Etter full tid kunne dei blåkledde juble over ein solid 38-29-siger, noko som varma godt hos Galdikas.

- Det var ein bra kamp, og eg er veldig fornøgd med laget i den andre omgangen, seier litauaren.

Møtest til dyst

Søndag blir lagvenninner og trenarkollegaer plutseleg motstandarar, ettersom dei to Hødd-laga møter kvarandre i serien. Det er eit oppgjer som begge trenarane ser fram til.

- Det blir spanande. Det er eit lag som vi trenar mot tre gonger i veka og som kjenner oss godt. Det er eit lag som har spelt jamt mot Langevåg tidlegare. Samstundes som dei kjenner oss, så kjenner vi også dei godt. Vi veit kva styrker og svakheiter dei har i laget. Så det blir spanande, men vi må løfte oss eit par hakk i både angrep og forsvar om vi skal klare å få med oss eit resultat i den kampen. Det er ein kamp vi gler oss til, seier Bjerknes.

- Eg håper at vi vinn! Samstundes så skal vi jo passe oss for at vi kan jo tape! Dei har blitt betre og betre. Så mykje kan skje. Det blir ein fin sjanse for dei å vise kor gode dei er, og ikkje minst for trenaren deira som eg synest får ut det beste i dei, seier Galdikas og rettar blikket spøkjefullt mot Bjerknes.

- Det blir ein god kamp, ein fight - ein "friendly fight", legg han til.

KAMPFAKTA

Hødd2 - Langevåg 2 (10–16) 20–28

Hødd: Ann Kristin Eikrem, Eline Fylsvik (1), Selene Meinseth, Astrid Grimstad (6), Charlotte Sundnes (6), Marte Barstad (2), Maren Hofseth, Rikke Amundsen (4), Ingebjørg Oscarsson (1)

*

Hødd 1 - Sykkylven/Stranda (18-18) 38-29

Hødd: Marie Ulstein, Cecilie Roppen (3), Thea Overvåg Tafjord (1), Guro Kalvø Vattøy (4), Karoline Ulstein (1), Marte Åsmo (2), Lindi Charlotte Galschiødt (5), Ronja-Helen Abrahamsen (8), Birthe Holstad Urke (5), Elisabeth Økland (9)