- Vi har bygd liknande båtar før, så vi kjenner godt til byggemetoden. Men, denne båten blir likevel ganske så spesiell, med tanke på alt ekstrautstyret som skal om bord, seier Asbjørn Vattøy.
Vattøy har vore prosjektleiar for Kleven på dette bygget, og ser fram til å kunne levere båten til kunden De Beers i slutten av juli.
Då skal den til Sør-Afrika, der det meste av dekksutstyret skal monterast. Heile 2.000 ekstra tonn utstyr skal om bord der nede, seier Vattøy.
Vellukka test
Prosjektleiaren fortel at prøveturen båten er på no, rundt Hareidlandet og innover fjordane, går mest på å fininnstille det dynamiske posisjoneringssystemet, og elles finne feil som kan rettast før turen går vidare til sørlegare breiddegrader.
- Det har vore ein vellukka testtur så langt. Etter at ein har fått på meir utstyr i Cape Town, må ein uansett justere det dynamiske posisjoneringssystemet endå ein gong. I tillegg må det også då utførast ei oppdatert krengeprøve, seier han.
Rundt årsskiftet vil diamantutvinningsgiganten De Beers byrje å teste skipet i drift.