Havyard Production & Service (HPR), som er basert i Gdansk nord i Polen, skal gjere elektroarbeid i to av sju sonar på ein serie av cruisebåtar til reiarlaget Celebrity Cruises, eit dotterselskap av Royal Caribbean Cruises.
Kontrakten omhandlar fire cruiseskip i EDGE-serien med opsjon på ytterlegare eitt cruiseskip i same serie. Arbeidet på første nybygget byrjar allereie i april og sikrar arbeid for den polske avdelinga til Havyard ut 2022. Skipa skal byggast ved STX France-verftet i Saint Nazaire. Kvart av skipa i Edge-serien har kapasitet til heile 2.900 passasjerar, lengde på 300 meter og veg heile 117.000 bruttotonn.
Dotterselskap
HPR blei starta i 2011 som eit dotterselskap av verftet i Leirvik, Havyard Ship Technology men er no eit eige forretningsområde i Havyard Group ASA. Selskapet har vore ein viktig del av Havyard som leverandør av både komplette pakkar og støttefunksjonar innen kontraktshandtering, engineering og prosjektstyring, elektro-, ventilasjon-, røyr-, måling- og stillasarbeid. Men selskapet har i stadig aukande grad også levert sine tenester til selskap utanom Havyard Group.