- Morgentåka kjem med sol og varme, sidan då fordampar mykje vatn. Når det blir kjølegare vil luftpartiklane kondensere til små vassdråpar. Lokal tåke oppstår i rolege vindforhold, og der det er tilgang på fukt, seier meteorolog Anne Solveig Andersen ifølgje Yr.no.
Slik dannast morgentåke
- Om det er fuktig luft, gjerne nær kysten eller ved eit vatn, vil tåka dannast til dømes når temperaturen har vore relativt høg om dagen, og fell om natta. Kaldare luft held på mindre fukt og dermed dannast skyer eller tåke. Tåke er skyer som er i kontakt med bakken, forklarar Andersen.
Slik forsvinn tåka
- For at tåka skal lette må vi ha ei omrøring i luftlaga som gjer slik at fukta vert «spreidd». For at tåka skal forsvinne er det avhengig av kor tjukt tåkelaget er, og dette spelar igjen ei rolle for kor mykje vind som må til for å skape omrøring. Om solinnstrålinga er tilstrekkeleg kan lufta varmast opp slik at den kan halde på meir fukt eller gjer slik at tåka stig. Vind kan også gjere at tåka forsvinn. Nok vind gjer at det kan bli ei skifting i luftlaga, fortel Andersen.
Ifølgje Metrologisk institutt er meldingane lovande for Hareid og Ulstein også i dag, og morgentåka vil truleg forsvinne i løpet av dagen.