Den såkalla «Gullblokka», det ikoniske bygget i sentrum av Ulsteinvik, som i dag er administrasjonsbygget til Rolls-Royce Marine, skal seljast. No skal dei fleste av dei i overkant 100 tilsette som har kontor her flyttast til Hjørungavåg.

«Gullblokka» blei oppført tidleg på 1980-talet, og var i si tid administrasjonsbygget til Ulstein-konsernet, før det og produksjonslokala blei seld til britiske Vickers i 1999 og seld vidare til eit anna britisk konsern, Rolls-Royce, nokre månader etter. No er bygningsmassen i ei slik forfatning at den britiske industrigiganten må tenkje nytt.

Interesserte kjøparar

«Gullblokka» er no til sals, og kommunikasjonsdirektør i Rolls-Royce Marine, Anette Bonnevie Wollebæk fortel til Vikebladet Vestposten at konsernet har god dialog med fleire interesserte kjøparar, som kan tenkje seg det ikoniske bygget.

– Vi jobbar med dette no, og i mellomtida skal dei som har kontorplass her over til andre av våre lokalitetar, seier Anette Bonnevie Wollebæk.

Ho fortel at brorparten skal til lokala i Hjørungavåg, medan arbeids- og oppdragssituasjonar avgjer om nokre også skal til Ålesund eller administrasjonsbygg ved propellfabrikken i Ulsteinvik. Somme har tidlegare blitt flytta til Hjørungavåg, og då lokalavisa skreiv om arbeidet med «Gullblokka» i april i fjor, blei det forklart at arbeidsklimaet i bygget var av ein slik standard at noko snart må gjerast. Det fortalde prosjektansvarleg Olav Korshaug.

– For oss handlar det om å finne gode løysingar til våre tilsette, og gi dei moderne og effektive kontorlokale som også tilfredsstiller HSE-krava (helse, tryggleik og miljø), sa Korshaug.

– Godt informerte

Kommunikasjonsdirektøren seier at dei tilsette har visst om dette ei god stund allereie.

– Alle våre tilsette er godt informerte om dette. Det einaste no er at vi ikkje veit akkurat når flyttinga blir gjort, vi er avhengige av at kontorbygget i Hjørungavåg blir klart, seier Anette Bonnevie Wollebæk.

Planen er at dei tilsette som får nye kontor i Hjørungavåg blir her mellombels, og ikkje lenger enn \ut leigeperioden. Leiga av kontorbygget i Hjørungavåg, som er eigd av Sævik-familien, går ut i mars 2019.