– I omgrepet autoritativ leiing ligg det ikkje leiing på leiarnivå, men at alle som er i ein relasjon til, eller som har ei rolle opp i mot born eller unge i Hareid skal utøve den kvaliteten som det ligg i å vere ein autoritativ leiar. Det handlar om evna til å skape relasjonar og i ein relasjon er det alltid eit samspel mellom minst to. Samstundes skal ein utøve kontroll, forklarar Siv-Marit Røyset Kaldhol, rektor ved Hareid ungdomsskule.
Ho og mange andre frå Hareid, både innan oppvekstsektoren, barnevernet og helsetenester, samt politikarar og tilsette i administrasjonen, var samla til ein dag med fagleg påfyll i Ulsteinvik tysdag.
– Alle som veks opp i Hareid kommune skal møte den autoritative leiinga frå dei er 0 til dei er 16 år, og gjerne lenger. Ressurssenteret er representert her, og dei har vaksenopplæring. Så det gjeld eigentleg for alle aldersgrupper, seier Røyset Kaldhol.
– Fin møtearena
Vivian Johansen er rektor ved Bigset skule, og følte ho lærte mykje av det dei fekk vite under kompetansehevingsdagen.
– Dette er ein fin tverrfagleg møtearena. Det har vore veldig kjekt, og lærarane har vore veldig positive til å møtast midt i skuleåret. Det gir dei både eit avbrekk frå den vanlege skuledagen og godt fagleg påfyll, seier Johansen og legg til:
– Det er dei same borna og ungdommane vi møter, innanfor alle dei ulike sektorane, før eller seinare. Det å kunne samhandle og skape ein felles plattform er viktig.
– Borna våre er det mest dyrebare vi har, og vi skal lage eit godt oppvekstmiljø rundt dei. Då er slike samlingar svært viktige, seier Oddbjørn Grimstad, fungerande kommunalleiar for oppvekst i Hareid.
Strategisk
Varaordførar Kristian Fuglseth var ein av dei politiske representantane under samlinga.
– Hareid kommune har vedteke at vi skal ha ein kvalitetsplan for oppvekst. Dette er eit ledd i den planen, der vi seier at alle tilsette skal vere med på kompetansehevinga. Det er veldig viktig at vi lyfter blikket, og ser overordna strategisk på kvalitet i skulen i Hareid.
