Teknisk Ukeblad kunne i førre veke, etter ein dokumentarfilm av mediehuset Vice, fortelje at ein arbeidar ved Crist-verftet i Polen brann i hel under sveising av skroget på det norske skipet Polar Empress.
Dokumentaren hevar at arbeidaren var nordkoreansk tvangsarbeidar som jobba under slaveliknande forhold. Liket skal ha blitt sendt tilbake til Nord-Korea saman med 637 euro i kompensasjon til familien.
Kleven var oppdragsgivaren til Crist, og då Teknisk Ukeblad i førre laurdag tok kontakt med Kleven, viste det seg at dei ikkje var kjende med dokumentaren og eventuell bruk av nordkoreanske arbeidarar.
- Heilt uakseptabelt
Kleven har i etterkant hatt møte på leiarnivå med Crist-verftet.
Konsernsjef Ståle Rasmussen skriv i ein e-post til Teknisk Ukeblad at dei vart gjort merksame på bruken av nordkoreanske underleverandørar ved Crist førre helg, og at dei no har hatt møte med leiinga i Crist.
- Der formidla vi vårt klare standpunkt om at dette er heilt uakseptabelt, og at vi forventar at det opphøyrer umiddelbart. Vi kjem til å følgje opp saka tett.
Fleire kommentarar vil Rasmussen ikkje gi.
