Det seier Magne Larsen, styreleiar i Søre Sunnmøre Matmanifest, som no jobbar inn mot skulane i regionen. Målet er at ungdommen skal lære å drive jorda.

– Vi har fleire prosjekt på gang, men det som er mest viktig er å få ungdommen i arbeid, og prøve å få praktikarar på skulane til å komme til jordbruket. Så skal vi prøve å skaffe jord som desse kan praktisere og øve seg på, seier Magne Larsen til Vikebladet Vestposten.

Fleire kommunar er med

Magne Larsen er som sikkert fleire no veit, styreleiar i Søre Sunnmøre Matmanifest, og er mannen bak ideen om eit slikt manifest. Det har vore oppe til politisk handsaming i fleire av kommunane på Søre Sunnmøre, og til no har Hareid, Ulstein, Sande, Volda og Vanylven knytt til seg manifestet. Det skal også opp til politisk handsaming i Ørsta og truleg også i Herøy etter kvart.

Har kontakta skular

Med det siste prosjektet i emning har Larsen vore i kontakt med fleire skular i regionen, og tilbakemeldingane har vore svært positive.

– Kanskje få vi fleire som blir interesserte i å drive jorda, og som kanskje kan tenkje seg å bli bønder til slutt. Det hadde vore eit fint resultat av ei slik satsing, seier Larsen.

Matmanifest-styreleiaren har også eit håp om at vedkomande som eig jordstykke kan bli med og hjelpe til.

– Vi treng kyndige folk til å lære vekk slik kunnskap. Det ideelle hadde nok vore å få pensjonistar som eig jord til å bli med på eit slikt tiltak, men alle dei som ønskjer det kan sjølvsagt få vere med. Det set vi enormt stor pris på, seier Magne Larsen.

Vil få tilbake matjorda

– Noko av grunnlaget for at vi starta Søre Sunnmøre Matmanifest var for å få tilbake matjorda, som litt etter litt, her som i dei aller fleste andre regionane i landet, blir nedlagd. Om velviljen matmanifestet har fått til no held seg oppe, vil dette bli veldig, veldig bra, seier Larsen.

Å drive gard og jord er nesten meir som ein livsstil enn eit yrke. Larsen meiner at det sikkert er fleire der ute som kan tenkje seg å utforske korleis det er å jobbe med dette, men som ikkje veit korleis ein gjer det.

– Det er noko med å få dei unge med på å grave og ploge i jorda, setje potet, gulrøter og anna. Rett og slett at ein kan sjå at det ein gjer faktisk ber frukter.

– Kortreist mat er i vinden for tida, og vi burde oftare stille oss spørsmålet kvar den «kortreiste» maten eigentleg kjem frå. Dette er heldigvis noko fleire og fleire blir medvitne kring. Håpet no er at vi kjem i gang med dette prosjektet til hausten.

Om den som les dette skulle ha eit jordstykke dei kan tenkje seg å vie til eit slikt formål, kan ein kontakte Søre Sunnmøre Matmanifest ved styreleiar Magne Larsen.