Det gamle huset var barndomsheimen til Anne Karin Vattøy Nygjerde, som er kona til Jarle. Ho budde på Vattøya til ho var to år i 1958, då vart huset fråflytta.
For ti år sidan søkte familien om å få rive gamlehuset og setje opp eit nytt. Først for tre år sidan var byggeløyvet i boks.
- Det har vore ein lang prosess. Ulstein kommune har vore veldig positive heile vegen, men vi har møtt ein del motstand i fylkeskommunen. I tillegg vurderte Riksantikvaren å verne det gamle huset, fortel Jarle Nygjerde.
Materiale frakta med helikopter
Gamlehuset vart rive for tre år sidan. Tysdag denne veka vart alt som trengst for å bygge eit nytt hus frakta med helikopter frå Gåsneset til Vattøya.
- Det er ganske mykje planlegging som ligg bak, det er mykje logistikk. Vi måtte til dømes vente til 1. august med å bruke helikopter, på grunn av hekketida for fuglane, seier Nygjerde.
Den første dagen vart det sett opp fire veggar. Det er Enerbygg i Ørsta som er byggherre, og målet er å ha ferdig råbygget til 1. september.
- Innreiinga skal vi gjere sjølv, fortel Jarle Nygjerde.
Ikkje straum
Det nye huset skal ha to etasjar og vere på 50 kvadratmeter. Iføgje Nygjerde er målet å få det så likt som råd gamlehuset.
- Vi skal byggje oppatt i same stilen, ha same farge, fortel han.
Han er glad for at dei endeleg er i gang med bygginga.
Huset skal brukast som hytte.
- Det er ikkje straum på øya, så vi må basere oss på aggregat eller solceller. Vatn har vi heldigvis i ein eigen brønn på eigedomen, seier Jarle Nygjerde.