Både fylkesmannen og fylkeskommunen har innspel til den planlagde utbygginga i Øvre Ringen i Ulstein kommune.

Ulstein kommune har hatt detaljregulering for området ute til høyring, og fristen for å kome med innspel var 11. november.

På kommunen si heimesida heiter det at føremålet med detaljreguleringa er å tilretteleggje for konsentrert utnytting i form av ei bustadblokk og ein firemannsbustad med tilhøyrande leikeplass og infrastruktur.

Born og unge

Møre og Romsdal fylkeskommune skriv i sitt svar at begge byggeområda og delar av leikearealet er relativt smale.

- Dette gir lite moglegheiter for uteopphald. Vi rår til at ein skil leikeareal og byggeområde, der ein legg leikeareal i hele si breidd i aust, langs Høddvegen og bustadområde i vestre del av planområdet. Gjer ein dette vil ein få ein skjerma leikeplass, den vil vere godt skjermafor støy, ha trygg tilkomst for fleire og ha gode solforhold, skriv saksbehandlar Mari Anne Bjørkmann.

Fylkeskommunen ber kommunen vurdere bustader i kjede, i staden for såkalla korsdelte firemannsbustader.

- Vi ser at det stadig vert ei utfordring med uteopphaldsareal og korsdelte bustader, sidan utearealt framstår mindre tilgjengelig for bustadene over bakkeplanet. Ved å gjere denne endringa trur vi at også trafikksituasjonen for heile området vil bli ryddigare, skriv Bjørkmann.

Ho meiner ei slik endring vil gje eit leikeareal som i større grad vil kunne verte ein samlingsplass for fleire generasjonar og eit område for både leik, hygge og moro.

Kan verte oppfatta som privat

Og fylkesmannen er oppteken av det planlagde leikeområdet.

- Delar av leikearealet er smalt, og vil kunne verte oppfatta som privatisert og ikkje eigne til leik på grunn av nærleik til bustadblokka, skriv seniorrådgjevar Kari Bjørnøy.

Ho skriv også at delar av byggeområda er smale, noko som gjer det vanskeleg få til gode opphaldsareal ute.

- Plankartet viser at det er sett av eit areal på 2,1 dekar til leikeplass. Vi kan ikkje sjå at det går fram av verken planomtale eller føresegner kor mange bueiningar det vert opna opp for innanfor planområdet. Dette er nødvendig for å finne ut om det er sett av tilstrekkeleg leikeareal, skriv Bjørnøy hos fylkesmannen.

Vil ha nærare skildring

Fylkesmannen peikar også på, at planområdet på rundt 7,5 mål er sett av til bustader i gjeldande kommuneplan.

- Området skal nyttast til ei bustadblokk med maksimal mønehøgd på fjorten meter. Ei slik bustadblokk vil gjere mykje av seg i landskapet, og det bør difor ligge føre ei nærare skildring/illustrasjon om bygningen, heiter det i høyringssvaret frå fylkesmannen.