Lagoppstillingar:
Ullensaker/Kisa: McDermott - Amundsen, Braaten, Rosenkilde, Dragsnes - Aas, Jørstad, Krogstad, Solberg - Ødemarksbakken, Alba
Benk: Vangen, Mundal, Rognerud, Stensby, Falkeborn, Torp.
Hødd: Jan-Lennart Urke - Hugues Wembangomo, Jesper Törnqvist, Steffen Moltu, Dani Hatakka - Torbjørn Kallevåg, Bendik Torset, Fredrik Sjølstad - Joachim Magnussen, Didrik Sereba, Robin Shroot.
Benk: Ole Monrad Alme, Sondre Beite, Øystein Vestvatn, Bendik Rise, Martin Mork Breivik, Jeff Mensah.
Før kampen:
Hødd reiser sundag til Jessheim Stadion for å møte Ullensaker/Kisa. Laurdag ettermiddag var trenar Steinar Lein på plass på Høddvoll for å følgje nysigneringa Jeff Mensah i aksjon for Hødd 2. Lein stadfestar at dansken blir med i troppen til sundagskampen.
Mensah såg ut til å finne seg greit til rette i løpet av førtifem minutt for Hødd 2. Det var også første sjansen Lein hadde til å sjå nysigneringa i kamp.
- Han har gitt eit veldig godt førsteintrykk som type. Han er veldig positiv, smilande og det er viktig når vi skal hente spelarar, at det er nokon som kan gje litt energi inn i gruppa. Jeff ser også ut til å trivst veldig godt her og ønska seg sterkt hit, medan vi har fått sett at dette er ein bra fotballspelar, seier Lein.
Trenaren peikar også på at Mensah har bra med erfaring frå dansk førstedivisjon og frå Superligaen.
- Men han er nok ein spelar som treng ein liten restart på karrieren, og det er mange som har kome hit og lukkast med det, seier Lein.
Møter godt heimelag
Ein som ikkje blir med til kampen mot Ull/Kisa er Christoffer Aasbak. Han fekk sitt femte gule kort mot Mjøndalen, og må stå over.
- Joakim Wrele er litt usikker og hadde litt feber i natt, men elles så er dei vi har hatt disponible den siste tida tilgjengelege, seier Lein. Også Bendik Torset er tilbake etter å ha gått glipp av kampen mot Mjøndalen.
Hødd har blitt eit svært godt heimelag, og står no med fem strake sigrar på eigen grunn, men også Ull/Kisa leverer heime og har vunne sine fire siste heimekampar. Det lovar ikkje berre bra for eit Hødd-lag som berre har eitt bortepoeng denne sesongen.
- Dei er eit bra heimelag og har spelt seg inn i divisjonen, slik som mange nyopprykka lag må gjere. Dei har fått meir orden på strukturen og er eit bra fotball-lag. Det blir nok tett og jamnt også i denne kampen, trur Lein.
Kampstart på Jessheim Stadion er 18:00. Vi følgjer kampen her på Vikebladet.no.
