Det som skulle bli eit førebuande løp for Dimna IL-utøvar Karsten Warholm no i helga, blir i staden nesten ein blåkopi av løpa på Bislett stadion og i Stockholm. Så sterkt trur han løpet kan bli, at det vil bli sett ny banerekord i Vaasa.
– Vi kjem heilt sikkert til å springe under 49,39 (banerekorden). Det er mange gode løparar med, sa Karsten til NTB torsdag, under pressekonferansen før lag-EM.
Til samanlikning sprang Karsten i mål på tida 48,25 under Bislett Games førre veke.
Sterkt felt
Den tyrkiske europamesteren Yasmani Copello står nok ein gong på startstreken saman med Warolm, i tillegg til den irske OL-firaren Thomas Barr, sveitsiske Kariem Hussein, som vann EM i 2014, den estlandske OL-finalisten Rasmus Mägi og den finske EM-finalisten Oskari Mörö.
Det blir kvalifisering fredag, etter planen klokka 15:10 (16:10 finsk tid), og finalen skal etter programmet gå laurdag klokka 13:47 (14:47 finsk tid).