- Dette er skikkeleg gøy altså! Taekwondo er råstilig, seier 7 år gamle Mathias Kvalsund Ulstein. Han har vore med i Ulstein Taekwondo Klubb sidan han var fem år gammal. Mathias har nettopp motteke ei medalje når Vikebladet Vestposten møter han, som synleg bevis på at han har vore med på barnefestival.
- Eg byrja når eg var fire år gammal, og det er like kjekt enno, seier Rakel Martine Løseth (7). Også ho har vore med nokre år, og trivast godt med dei ulike øvingane ein skal gjennom.
- Veldig kjekt
Ein av dei litt eldre medlemmane i klubben, og trenar, Magomed-Khan Kudosov, fortel at fleire enn forventa møtte opp på open dag.
- Det var ganske mange nye å sjå, og det er sjølvsagt veldig kjekt. Etter det eg kunne telje var det godt over 90 born. Rundt halvparten er medlemmar allereie, men om dei nye som var med i dag blir med, så er det veldig kjekt for oss, seier Kudosov.
Magomed-Khan meiner det er viktig at også andre sportar får skikkeleg innpass i Ulstein-samfunnet.
- Fotball er jo den store sporten. Eg trur likevel det er ganske mange som har fått augene opp for taekwondo, og det er viktig for sportstilbodet i området.
Etter treningsseanen fekk dei frammøtte både pizza og frukt.
- Det må noko ekstra til på slike dagar, seier Magomed-Khan og smiler.
Trening og venskap
Alle borna som er medlemmar frå før fekk i oppgåve å ta med seg ein ven, og det ser ut til å ha vore ein suksess, fortel trenaren.
- Dei får sjå kva taekwondo er, og dei får bli kjent med sporten og kanskje får dei seg nye vener. Her lærer borna disiplin og mentalt så vel som fysisk kva taekwondo går ut på, seier Magomed-Khan Kudosov.
Ulstein Taekwondo Klubb blei stifta i 1996, og satsinga har vore litt på og av opp gjennom åra. Dei siste to åra har medlemmane i klubben jobba hardt for å få opp igjen aktivitetsnivået, og leiinga er no nøgde med situasjonen. Då gjenstår det å sjå kor mange nye medlemmar klubben kan få av dei som møtte opp på open dag.