Torbjørn Kallevåg spelte sine siste 90 minutt på heimebane for Hødd mot Hønefoss laurdag. Han var mest av alt godt nøgd med siger og tre poeng, men vedgår at det var tungt i etterkant av oppgjeret.

- Det var veldig kjekt med siger. Ein viktig siger ikkje minst. Samstundes var dette ein spesiell kamp, då det er siste gong eg speler framfor Høddvoll-publikummet i Hødd-trøya. Eg må innrømme at eg blei ganske rørt av det heile. Det kom nokre tårer ute på bana etter kampslutt, og nokre til i garderoben saman med gutta, seier Torbjørn Kallevåg til Vikebladet Vestposten.

Rett før kampstart overrekte Blåsarane prisen "Årets Blåsar" til Torbjørn, og med det krona ein flott sesong for bømlingen med heideren for årets spelar.

- Eg har aldri fått ein slik pris før, verken på senior-, junior- eller guttenivå. Dette var stort for meg, seier han.

Les også: - Mange gode minne

Blir ein del av FK Haugesund på nyåret

Kallevåg blir som kjent å sjå i Eliteserien neste år, då han får reise "heim" og bli ein del av troppen til FK Haugesund ved starten av neste sesong.

- Eg blir i Ulsteinvik til godt ut i november, og byrjar ikkje å trene med FKH før ut på nyåret. Så folk får nok sjå meg litt til, eg forsvinn ikkje med det første.

Kallevåg blir også med Hødd til Egersund neste helg, og håpar på nye tre poeng der.

Han fortel om eit god tid i Ulsteinvik, som ein del av eit framstormande mannskap, med ei god framtid.

- Det er sjølvsagt veldig leit å ikkje skulle spele her meir, men eg er trygg på at Hødd vil ta nye steg i åra framover. Eg har fått mange gode ord og positive helsingar dei siste dagane. No får eg prøve meg på eit høgare nivå, noko eg har drøymt om lenge. Eg er enormt takksam for det Hødd har vore for meg desse åra, og eg vil takke eit flott heimepublikum for at eg fekk vere med på reisa saman med dei, seier Kallevåg.

- Fortent siger

Kampen mot Hønefoss blei aldri spesielt spanande, men Badr Rahhaoui scora målet som skilde laga, og sikra med det tre poeng. Det er Torbjørn Kallevåg godt nøgd med.

- Vi var gode, og sjølv om eg også burde funne vegen til målet i dag, sikra vi oss ein fortent siger. Dette var ein kamp vi skulle vinne. Vi hadde god defensiv kontroll i dag, og sleppte ikkje inn mål, noko som har vore eit stort fokus. Niande kampen på rad utan å tape smakar godt.

Eid: - God kontroll

Hødd-trenar Sindre Eid gav Torbjørn Kallevåg ein god klem etter kampslutt. Han var godt nøgd med at Torbjørn og dei andre karane drog i land ein siger.

- Det var ikkje akkurat eit fyrverkeri av ein kamp. Med ein snittalder på 21,9 år, og mange nye spelarar i aksjon, så er det klart at ikkje alt stemmer heilt. Det første kvarteret var rufsete, men vi spelte oss greitt opp igjen. Alt i alt føler eg vi hadde god kontroll på kampen, seier Eid.

Kampfakta

Hødd – Hønefoss 1-0 (1-0)

Høddvoll

Dommar: Ole-Alexander Ekeli Valen, Kråkerøy IL

Gule kort: Badr Rahhaoui, Hødd. Aleksandr Dmitrijev, Hønefoss

Mål: 1-0 Badr Rahhaoui (28)

Hødd (3-5-2): Ole-Monrad Alme - Eirik Haugan, Henrik Breimyr, Steffen Moltu - Daniel Eid, Torbjørn Kallevåg, Andreas Breimyr (Skotheim, 75), Eirik Saunes, Bendrik Rise - Badr Rahhaoui (Torset, 67), Robin Hjelmeseth (Shroot, 67)

Innbyte: Sivert Pieroth, Jesper Törnqvist, Preben Sætre, Robin Shroot, Magnus Myklebust, Bendik Torset, Isak Skotheim