Harley Quinn (Margot Robbie) og hennar heilkvinnelege junta skal redde ei ung jente frå ein vond kriminell i «Birds of prey»  Foto: Claudette Barius

Filmvåren: Desse filmane gler vi oss til

Kvinnelege superheltar, James Bond og snakkande dyr. Vi tar ein titt på kva som melder seg av filmgodteri frå det store utlandet framover.

Kvinnelege superheltar ser ut til å bli ein trend i filmåret 2020, som også byr på comeback for James Bond – og dessutan nye filmar regissert av Joe Wright, Sofia Coppola og Greta Gerwig.

Dr. Dolittle Dette bildet frå Universal Pictures viser Dr. John Dolittle, spelt av Robert Downey med Jip, som får stemme av Tom Holland.  Foto: Universal

«Dolittle». Regi: Stephen Gaghan. Norsk premiere 17. januar

Dr. Dolittle er tilbake i ny tapping med Robert Downey Jr. i rolla som mannen som har evna til å snakke med dyr. Menneske har han lite til overs for. Men når dronninga blir skikkeleg sjuk, blir han heilt nøydd til å trå til. Ei eventyrleg reise til ei mystisk øy, for å finne riktig medisin, står for tur, melder Filmweb.

«The Lighthouse». Regi: Robert Eggers. Norsk premiere 24. januar

Her kjem det noko så sjeldan som eit kritikarrost grøssar-epos med Robert Pattinson og Willem Dafoe i rollene. New York Post, The Guardian og Variety; Alle vender dei tommelen opp. Kritikarane bruker ord som «meisterverk» og «skinande Pattinson».

Colin Firth spelar i krigsdramaet «1917»  Foto: Universal

«1917». Regi: Sam Mendes. Norsk premiere 24. januar

Vi får følgje to unge britiske soldatar som skal ut på eit nervepirrande og ekstremt viktig oppdrag medan første verdskrigen rasar. Storslegne effektar – og mange store namn, som Colin Firth og Benedict Cumberbatch er med. Filmen blir beskriven som eit møte mellom «Saving Private Ryan» og «Dunkirk».

Emma Watson, Saoirse Ronan, Eliza Scanlen og Florence Pugh i ein ny filmversjon basert på den klassiske romanen «Little Women».  Foto: Wilson Webb

«Little Women». Regi: Greta Gerwig. Norsk premiere 31. januar

Ein ny versjon av klassikaren «Little Women» melder seg også i vinter. Her har regissøren ønskt å halde fast ved sjarmen i originalen, samtidig som ein kan merke Gerwigs grep om denne søster-historia. Rollebesetninga er ikkje mindre enn imponerande, med Saoirse Ronan, Timothée Chalamet, Meryl Streep og Florence Pugh.

Noregsaktuelle «Parasitt» byr på ein familie på fire som bur under kummerlege forhold – men får ei gyllen moglegheit til noko betre. Filmen gav regissøren Sør-Koreas første Gullpalme i fjor.  Foto: Arthaus / handout

«Parasitt». Regi: Bong Joon-Ho. Norsk premiere 31. januar

Den koreanske filmen «Parasitt» har tatt verda med storm sidan han vann Gullpalmen i Cannes i fjor. Dette er ei blanding av krim, satire, drama og splatter, ein heilt eigen sjanger, med andre ord. Filmen handlar om ein fattig familie som plutseleg får innpass i verda til dei rike.

«Uncut Gems». Regi: Brødrene Safdie. Premiere på Netflix 31. januar

Det er store forventningar til Adam Sandlers samarbeid med brørne Safdie. Her er det duka for eit thrillerdrama om ein litt storkjefta dealer og gullsmed i New York, som endar opp med å skulde feil folk pengar.

«Birds of Prey (And the Fantabulous Emancipation of one Harley Quinn)". Regi: Cathy Yan. Norsk premiere 7. februar

Nokon tenkte rett då Margot Robbie vart sleppt laus i «Suicide squad» (2016). Robbies tolking av den galne DC Comics-karakteren Harley Quinn vart superpopulær – og no får ho boltre seg i ein eigen film. Ho ser ut til å ha dumpa Joker og no støttar ho seg til ikkje mindre enn tre andre kvinner med superkrefter.

«The Gentlemen». Regi: Guy Ritchies. Norsk premiere 28. februar.

Skal vi tru dei første meldingane om denne filmen, så er Guy Ritchie tilbake i «Snatch»-form. Og med seg på denne ferda til underverda i London har han stjernelaget Matthew McConaughey, Charlie Hunnam, Henry Golding, Michelle Dockery, Jeremy Strong, Eddie Marsan, Colin Farrell og Hugh Grant.

Daniel Craig er i farta som 007 for femte gong med Bond-filmen «No time to die».   Foto: Nicole Dove

«No Time To Die». Regi: Cary Joji Fukunaga. Norsk premiere 3. april

Daniel Craig svor etter den førre Bond-filmen på at det var slutt. Men her er han igjen – for femte gong. Vi gler oss til å sjå svenske David Dencik i ei av birollene – og sjølvsagt til scenene som er spelt inn i Noreg. Historia tar til når Bonds gamle CIA-kompis Felix Leiter kjem til Jamaica og ber om hjelp.

«Black Widow». Regi: Cate Shortland. Norsk premiere 29. april

Litt «Avengers»-mett er det lov til å føle seg etter den episke slutten med «Avengers: Endgame» i fjor. Men når Scarlett Johanssons rollefigur Natasha Romanoff/Black Widow får sin eigen film, som er regissert av Cate Shortland – og med Florence Pugh i ei av birollene, då er lysta på Marvel-moro tilbake.

«The woman in the window». Regi: Joe Wright. Norsk premiere 22. mai

Så er det duka for ei stjernespekka filmatisering av den bestseljande thrilleren «Kvinnen i vinduet». Ei lite glamorøs Amy Adams trer inn i rolla som den angstforfølgde einebuaren i New York, som slit med indre demonar, rus og at mystiske ting skjer i nabohuset. Ein god dose Alfred Hitchcock-inspirasjon er på plass.

«Wonder Woman 1984». Regi: Patty Jenkins. Norsk premiere 5. juni

Kor gøy blir ikkje dette? DC Comics-heltinna Wonder Woman (Galen Gadot) møter oss igjen i eit pastellfarga 1884. Leggvarmar-alarm, synth soundtrack og Kristen Wiig som lunefullt tilskot: Dette lovar godt.

«On the rocks». Regi: Sofia Coppola. Premiere på Apple, dato er så langt ikkje kjent

Rashida Jones spelar i denne filmen ei ung mor som tar kontakt med far sin (Bill Murray), ein aldrande playboy – og så ber det rett ut på eventyr i New York. Filmen er først ut i Apples store filmsatsing. Og forventningane er store til at Coppola attskaper litt «Lost in translation»-stemning når både storbypuls og Bill Murray er på plass.