Eit 70-tals publikummarar applauderte ivrig mellom nummera, men det var definivt plass til fleire i storsalen til Sjøborg kulturhus. Kulturskuleelevar frå Ørsta, Volda, Ulstein, Hareid, Herøy og Vanylven gav alt, sjølv om salen var glissen. Med eit repertoar henta frå fleire av dei største komponistane i musikkhistoria - som til dømes Antonio Vivaldi, Joseph Haydn, Felix Mendelsohn og Johann Sebastian Bach - var det mange godbitar som blei servert. Ulstein-kvinna Nadia Demirova - musikklærar ved kulturskulane i Hareid og Ulstein, og primus motor for Ytre Strøk - dirigerte på fem av nummera. Ho meiner strykar-elevane hennar har vist god framgang.
Den einaste cellisten i gruppa, 13 år gamle Ruben McMahon Møller, synest øvingar og konsertar er like spennande.
- Det er veldig kjekt å vere med og spele, fortel Ruben.
Etter å ha vore floge på veggen i Sjøborg under øvinga til ungdomssymfonikarane frå Ørsta og Volda, rett før konserten, fekk underteikna ein viss peikepinn på kva detaljar det blir terpa på i eit symfoniorkester på dette nivået. Stemming av det enkelte instrument kan vere tidkrevjande, men det må vere på plass for at heilskapen skal bli bra. Tempo, timing og forståing for det aktuelle verket er også noko som blir hamra inn. Det er truleg der det er mest å hente for å kunne samanlikne seg med profesjonelle symfonikarar. Uansett er endringa i konsentrasjonsnivået frå øving til konsert høgst merkbar. Samtlege var skjerpa då det gjaldt, og unotane var praktisk talt borte i det unge orkesteret, der det var mykje som verka uryddig under siste øving.
Kulturskulane bugnar over av elevar som vil lære seg å handtere ulike intrument og vere del av ein større musikalsk heilskap. På denne tida av året får dei vise fram kva dei har lært. Dirigent Knut Ose er full av lovord når han skildrar innsatsen til elevane sine. Sjølv er han smålåten i høve til å kommentere sin eigen innsats, men det var den same Ose som starta orkesteret for 40 år sidan.
- Det fortel jo litt. Knut Ose har ikkje jobba kontinuerleg sidan den gongen, men han lagt ned eit enormt arbeid for orkesteret gjennom mange år, seier Aksel Farstad, rektor ved Volda kulturskule.
Etter konsertar i Ørsta, Volda, Ulsteinvik og Sandane blir det no ei lita pause. Men i midten av desember er ungdomssymfonikarane frå andre sida av Eiksundfjorden tilbake med adventskonsertar, ein godt innarbeida tradisjon som publikum i Ørsta og Volda veit å setje pris på.
- Då er det alltid fullt hus. Kjekt for dei unge musikarane og kjekt for publikum som kjem for å høyre på, smiler Farstad.