Ved Ulsteinvik barneskule er dei i full sving med å arrangere dette samkomet for alle sjuandeklassingane i kommunen for at dei skal bli betre kjende før dei byrjar saman på Ulstein ungdomsskule.

– Det kjem minst 110 elevar, fortel Sebastian Mork Strand ivrig.

Elevane ved barneskulen er delt opp i mange komitear for å arrangere Grand Prix 2012. Dei har PR-komite, pyntekomite, komite for lyd og lys, scenecrew, matkomite, teknisk komite og ein komite for sminke og kostyme.

Ikkje berre musikk

Grand Prix 2012 for sjuandeklassingar er ikkje berre for dei som like rå opptre med musikk.

PR-komiteen fortel at det blir kåra ein vinnar for beste sceneinnslag og ein vinnar for beste utstilling. I sistnemnde er det mellom annan nokon som har laga ein kjole dei vil stille ut.

Elevane kan røpe at det kjem til å bli vist ein del film. Fleire har meldt seg på Grand Prix med filmar dei har laga. Elles skal nokre synge, nokre danse og nokre trikse med ball. Ei gruppe skal imitere Petter Northug, Bjørn Kjos, kongen og fleire andre kjendisar.

Det er framleis ikkje for seint å melde seg på. Påmeldingsfristen er 17. mai.

Gjesteartist

Astrid Oline Roppen og Ine Haakonsholm kan røpe at det kjem ein gjesteartist som skal syngje denne dagen, men det er hemmeleg kven det er.

Skal vere i lag heile dagen

Føremålet med arrangementet er at elevane skal bli litt kjende med kvarandre før dei byrjar på ungdomsskulen. Dei skal vere i lag heile dagen. Då blir det tid å prate saman og ete mat i lag, i tillegg til framsyninga.

PR-komiteen opplyser om at fleire innslag under Grand Prix blir av elevar frå ulike skular. Øvinga går føre seg på fritida, såleis blir dei kjende med andre gjennom øvingane.

Alle sjuandeklassingane ved Ulsteinvik barneskule skal lage kake, så det blir nok rikeleg med kaker denne dagen. I tillegg blir det truleg påsmurde rundstykke.

Tre framsyningar

Det blir heile tre framsyningar av Grand Prix 2012. Ein gong for alle sjuandeklassingane i Ulstein kommune, ein gong for alle elevane ved Ulsteinvik barneskule og ein gong på kveldstid for foreldra til sjuandeklassingane ved Ulsteinvik barneskule.

Arrangementet er lagt til loftet på Ulsteinvik barneskule.