Nina Vedeld Telseth frå Ørsta har tidlegare dirigert damekoret Lyst, men har no planar om å starte på eit nytt og spennande prosjekt. Ho skal starte eit internasjonalt kor for kvinner og menn frå 15 år og oppover, frå forskjellige kulturar.
- Det er eigentleg ganske enkelt. Eg må få tak i nordmenn og eg må få tak i folk frå andre kulturar, forklarar Telseth.
- Eg kallar det for ID-koret, eller choir. Eg prøver å skrive choir, for å vise at det er internasjonalt, seier dirigenten. Ho forklarar at ID står for identitet og idé og at målet med prosjektet er å styrke den enkelte og koret sin identitet gjennom møte med forskjellige kulturar.
- I møte med andre kulturar vil vi lære av kvarandre, og då vil vi også styrke vår identitet og lære meir om kven vi er. Fokuset på verdiar som nestekjærleik og solidaritet har blitt sterkare, samstundes som vi er blitt eit meir fleirkulturelt samfunn. Eg vil vise at vi på Sunnmøre også jobbar med identitetsstyrking og integrering.
Det er ingen opptaksprøvar, og i tillegg til song, har Telseth også planar om rop, rytme, kropp, dans og drama. Koret sitt musikalske uttrykk skal bere preg av at det er internasjonalt.
- Vi kan synge norske songar, men vi kan også synge songar frå Iran eller songar frå Polen. Eller kanskje vi kan finne andre måtar å synge på, ein blanding? Kanskje vi kan finne ein felles tone, eit eiget uttrykk, ei blanding av alle kulturane? Eg har ikkje planlagt så mykje, fordi det er i møtet med kvarandre at koret blir til.
Øvingane blir annenkvar tysdag på Møre Folkehøgskule i Ørsta. Første tida vil Telseth jobbe med at koristane blir kjende med kvarandre, stemmebruk og forskjellige måtar å synge på. Det store høgdepunktet blir når koret skal delta på ”Landfestival for kor” som arrangerast i Ålesund, 6.-9. juni 2013.
Er du interessert?