Broderi, måleri, teikneseriar og ei jakke som ein gong var ei bukse, er berre noko av det våre lokale deltakarar pakkar med seg bussen når dei komande veke set kursen mot Fylkes-UKM i EIdehallen.

– Hareid og Ulstein rakk akkurat å arrangere UKM-show før landet stengte ned på grunn av koronapandemien i mars 2020. Etter det har vi ikkje hatt noko show, men vi har arrangert UKM på andre måtar. Mellom anna har vi hatt workshops der deltakarane har fått jobba med både re-design, teikneseriar og laga sushi, fortel Marie Flatin som er ungdomsarbeidar og UKM-ansvarleg i Ulstein kommune.

Under Fylkes-UKM som går føre seg i Eidehallen i Hustadvika kommune frå måndag til torsdag komande veke, stiller våre lokale deltakarar ikkje med sushi, men både re-design og teikeseriar er med.

Klara Ferlič Jakmin frå Hjørungavåg er veldig glad i å teikne og ho fortel at ho stiller med Fylkes-UKM med ein teikneserie ho har laga som handlar om språk og kommunikasjon. Isa Brevik frå Ulstein har omskapt gamle 70-talsgardiner til ei praktisk veske og ho tek også med seg eit stort måleri til fylkesfestivalen. Arja Grimstad frå Hareid har laga ei sminkeveske der ho har brukt delar av ei gammal dongeribukse og ho har også med to bilete som ho har brodert. Lineah T. Åsmo frå Hareid har sydd ei jakke der bukselinningen er brukt til krage og buksebeina har blitt til armar. Stoffrestar frå ein gamal duk har også fått nytt liv. Jenny Warholm Engh frå Ulsteinvik jobbar med digital illustrasjon og ho vil ha med nokre av arbeida sine til festivalen. Dessutan deltek Prayana Selva frå Hareid med song.

I alt deltek sju ungdommar frå Hareid og Ulstein. Seks av dei er med som vanlege deltakarar og dessutan er Stine Veddegjerde frå Hareid med i arrangørstaben.

– Eg skal vere med på å sørge for at alt går slik det skal og at alle har det bra under festivalen. I tillegg skal eg vere konferanseier på opningskonserten og vere konferansiermentor for den siste forestillinga. Å vere konferansiermentor for første gong, kjenner eg er litt skummelt, men det er også kjekt å få slikt ansvar og å prøve noko nytt , seier Stine.

Ein annan som er med som mentor er Marion Øvrelid som til dagleg driv systova Saumromet. Ho er levande oppteken av gjenbruk og re-design.

– Vi kastar altfor mykje klede. Det meste kan reparerast eller syast om til andre ting, seier ho.

– Nokre av dei som har fått tilbod om å bli med til Fylkes-UKM har blitt plukka ut med bakgrunn i at dei har delteke på workshops, medan andre har blitt valgt inn via kultuskulane, forklarer UKM-ansvarleg i Hareid, kulturkonsulent Melinda Skeide.

– Det er ikkje meininga at UKM skal vere ein talentkonkurranse, målet er å få fram mangfaldet i det ungdommen styrer med, seier Marie Flatin.

Under UKM-festivalen vert det framsyningar, utstillingar og ei rekkje aktivitetar og workshops som dans, kor, brettspel, re-desgn og magi. Deltakarane skal bu i telt, men med det vêret det ser ut til å bli i helga er det heldigvis snakk om ein innandørs teltleir i Eidehallen.

Deltakarane frå Hareid og Ulstein gler seg til å reise og ser ikkje mørkt på å bruke store delar av haustferien på dette.

– Vi får halde å med det vi likar og i tillegg får vi treffe andre som har samme interesser som oss sjølve, dessutan har vi jo begge helgene fri, seier dei.