I oktober var Ela, Elias og Hege i Nairobi og Mombasa og fekk sjå med eigne auge det UVS, i samarbeid med dei vidaregåande skulane i Herøy, Borgund, Haram og Spjelkavik, har vore med på å bygge opp dei siste åra gjennom organisasjonen NSP-aid.
I fjor var skuleområdet på Malaika Villages Kiserian i Nairobi ein byggeplass, i år stod skulebygget klart, og klasseromet «Ulstein» var i full bruk til undervisning.
Sunnmøre home 2 stod no ferdig og var innflytta, med åtte barn og ei «mother» (husmor) som ga dei omsorg og oppfølging kvar dag. Vi fekk også sjå tomta der det skal byggast ein ny heim til åtte barn. Pengane som kjem inn på solidaritetsdagen skal gå til dette.
Heimebesøka og historiene til ulike familier i slummane i Nairobi ga veldig sterke inntrykk. Her kjem dei i frå mange av dei barna som får hjelp gjennom organisasjonen NSP-aid og det UVS bidrar med. Pengane elevane på UVS får inn på den årlege solidaritetsdagen er med på å gi nokre av desse barna moglegheit til skulegang og omsorg.
I Nairobi fekk Ela også møte fadderbarnet sitt, Justine, og mora hans. Nokre dagar etter vi var komne heim fekk vi den triste meldinga om at den 9 år gamle guten var død. Han hadde blitt sjuk, men døde før han fekk tatt den nødvendige operasjonen han trengde, då mor ikkje hadde pengar nok til å betale med ein gong. At noko slikt kan skje er for oss som bur i Norge heilt uforståeleg.
Det varmar å sjå gleda ungane (og dei vaksne) viser ved at vi bryr oss, og å oppleve takknemlegheita deira for å få hjelp, til skulegang og omsorg. På Malaika Villages Faraja utanfor Mombasa, fekk vi møte Samuel, eit av dei barna som frå han var liten har fått hjelp gjennom NSP-aid, og som i dag er helsefagarbeidar. Han fortalde litt av historia si, og om kva hjelpa han har fått har betydd for han.
«Nauda er stor, og vi makter ikkje å hjelpe alle. Samtidig ser vi at det er mogleg å hjelpe nokon» (nsp-aid). Fulle av inntrykk, på godt og vondt, og med minner for livet, har vi prøvd gjennom forteljingar, film og bilder å få fram bodskapen til elevane på UVS,-at det dei er med på, det nyttar!
Ela, Elias og Hege, elevar og lærar ved Ulstein vidaregaånde skule