I dagens avis presenterer vi inntektstopp, formuestopp og kor mykje dei rikaste i Hareid, Ulstein, Herøy og Sande har betalt i skatt. Ein del av talmateriellet er allereie publisert på vikebladet.no.
Offentleggjeringa ergrar somme, og gleder andre. Vi publiserer skattelistene fordi vi meiner det er informasjon av offentleg interesse. Offentlegprinsippet er ein garanti for eit ope og demokratisk samfunn, og ved å publisere skattelistene kan folk få innsyn blant anna i kor mykje dei rikaste av oss betaler i skatt.
Noreg er eit av dei landa i verda med best utbygd velferdssystem. Ei av hovudårsakene til dette er at vi betaler mykje skatt. Då er det viktig at skattesystemet er rettferdig. Offentlege skatteopplysningar gir folk sjansen til å oppdage manglar ved skattesystemet. Viss folk med høge inntekter og formuar betaler lite skatt, kan det vere eit signal om feil i skattesystemet.
Dei rike må tole å få merksemd retta mot seg. Kva vi betaler i skatt er ikkje ei privatsak, og inntekt og formueslistene kan brukast til meir enn underhaldning. Dei fortel noko om kven som bidreg med store summar til velferdsstaten, og kven som eventuelt prøver å snike seg unna. Og slikt skal pressa setje søkelyset på.