Det er fleire grunner til at det ikkje er ein god ide å sette tenestepensjonen i Hareid kommune ut på anbod.

Tenestepensjon er framtidig lønn, og retten til tenestepensjon er tariffesta for oss som jobbar i kommunane. Uansett kva leverandør Hareid kommune vel, så har vi krav på dei same vilkåra. I prinsippet burde det derfor vere utan betydning for oss kven som leverer pensjonen. Men fullt så enkelt er det ikkje.

Pensjon er langsiktig sparing. I dag har Hareid kommune pensjonsordning i KLP. No ynskjer dei folkevalde å sette pensjonsordningane i KLP, ut på anbod for å spare pengar.

Erfaringar viser at det er lite som skil mellom leverandørane når det gjeld kostnadar til administrasjon og forvalting. Det er også grunn til å tru at avkastinga på midlar som ein sparer over tid vil variere lite mellom leverandørane.

Det er med andre ord små marginar som skil mellom dei ulike leverandørane på marknaden. Så kva er det eigentleg å spare for Hareid kommune ved å vrake KLP?

Vi i Arbeidstakarorganisasonen Delta er heilt klare på at KLP bør veljast som pensjonsleverandør i kommunane ved elles like vilkår. KLP er ein kompetent og ryddig aktør som Delta har svært god erfaring med. KLP kan offentleg tenestepensjon og har vore svært lenge i det offentlege marknaden. I tillegg er KLP eigd av kundane – dvs. kommunane. Overskotet går også tilbake kommunane. Storebrand er den andre aktøren i marknaden. Dei er organisert som aksjeselskap. Mao er det aksjonærane som får utbyttet, ikkje kommunane.

Det er klare fordeler ved at kommunen også er eigarar i selskapet som leverer offentleg tenestepensjon til kommunen sine tilsette. Gjennom sitt eigarskap vil kommunen ta del i verdiskapinga som finn stad i selskapet og vere sikra ei moglegheit til å påverke dei avgjerder som blir tatt i selskapet. I KLP er kommunane også representert i dei styrande organa. I styret sit også representantar frå arbeidstakerorganisasjonene som dermed har innsyn i drifta.

Eit viktig element i offentleg tenestepensjon er at premiesystemet er kjønns- og aldersnøytralt. Premien blir berekna på grunnlag av alle kommunekundar. Utgiftene til pensjon blir utjevna på alle i fellesskapet. Det er ein fordel at dette utjamningsfellesskapet er stort og relativt stabilt over tid, for å sikre ein stabil premie.

KLP har vist seg som ein solid og sikker leverandør av tenestepensjon over mange år. Kvifor bytte ut noko som fungerer? I sist kommunestyremøte blei det vedtatt at ein ynskjer at det blir sett på konkurranseutsetting av pensjonen. Vi i Delta meiner dette uklok bruk av arbeidstida til dei i Administrasjonen i Hareid kommune på noko som kan ende opp som ei uklok investering. Delta er klare på nei til pensjon ut på anbod og at KLP som er den beste leverandøren på pensjon til Hareid kommune.