Sjukepleiemangelen i landet er godt kjent. Det er over 5000 ledige sjukepleiarstillingar i Noreg, og det jobbar 17 000 sjukepleiarar i andre typar stillingar enn helse og omsorg.

I Ulstein kommune har vi ikkje sjukepleiemangel, men vi ser at det er færre som søker på stillingane vi lyser ut enn før. Spesielt stillingar innan demensomsorg og tyngre pleie er vanskeleg å rekruttere til.

Det er stort arbeidspress og høgt tempo jamt over i alle avdelingar i helse og omsorg. Slik har det vore over tid. Periodane med lågare belastning er sjeldnare og varer kortare enn før.

I feriar og høgtider er det utfordrande å ha god nok sjukepleiardekning. Det er også vanskelegare enn før å få tak i nok vikarar, slik at tilsette får avvikla ferie i tråd med lov og avtaleverk.

Det er svært viktig at vi klarar å behalde alle sjukepleiarane vi har i dag i forhold til kontinuitet og kompetanse. Vi driv dagleg med medisinske prosedyrer som krev fagkompetansen vår. Til tider driv vi avansert medisinsk behandling både i heimar og på sjukeheimen.

Vi samarbeider dagleg med fastlegane og spesialisthelsetenesta, og vi er svært fleksible og løysningsorienterte for å levere best mogleg teneste til pasientane og brukarane i kommunen.

Helsesjukepleiarane er dagleg på helsestasjonen og skulane våra. Dei fokuserer på helsefremmande og forebyggande arbeid, og gir tilbod om oppfølging til alle barn frå svangerskap til og med 21 år. Det utdannast for få helsesjukepleiarar og det er vanskeleg å rekruttere.

Eg har spurt sjukepleiarane om kva som er viktig for dei i arbeidskvardagen, kva som skal til for at dei vil fortsette å jobbe i Ulstein kommune dei neste 5-10 åra.

Det som går igjen er auka grunnbemanning, moglegheit for fagleg oppdatering og gode turnusordningar, i tillegg til ei lønn som speglar ansvaret og oppgåvene dei gjer.

På bakgrunn av dette vil eg spørje deg og ditt parti om følgande:

1. Korleis vil du jobbe for at vi skal behalde og rekruttere sjukepleiarar i Ulstein kommune i dag, og i åra som kjem?

2. Korleis vil du jobbe for å auke grunnbemanninga i helse og omsorg?

3. Fleire stillingar ved Ulstein helsestasjon (svangerskapsomsorg, helsestasjon – og skulehelseteneste) vert finansiert med prosjektmidlar. Korleis vil du jobbe for å sikre at tilbodet som er i dag vert vidareført, og i framtida styrka, når prosjektmidlar ikkje lenger vert tildelt?

Mvh. Marianne Ertesvåg, Hovudtillitsvalt Norsk Sykepleierforbund