Har vi eit demokratisk problem i Ulstein?
Eg har no vore folkevald i Ulstein Kommune i snart 12 år. I løpet av denne tida har vi sett saker komme og gå, vi har fått Ulstein Arena, nytt bygg på Ulsteinvik Barneskule, Ulsteinhallen, nye Høddvoll, ny brannstasjon, Sjøgata, Sjøsida, omsorgsbustadar i Holsekerdalen, ny turnhall, ny veg i Holsekerdalen, og mykje anna, stort og smått. Saker som faktisk har kome og gått. Saker vi har vorte ferdige med.
Og så er det denne marerittsaka mi. Saka som eg har kjempa for gjennom mange år. Betre lokale for barnehagen i Sundgotmarka. Barnehagen som i mange år var den einaste kommunale barnehagen i Ulstein. Barnehagen som er delt i to, der dei yngste og eldste er delt på to lokalitetar. Der lokala er langt frå optimale for barnehagedrift. Der uteområda har hatt så mange store og alvorlege feil og manglar at nokre av dei vart karakterisert som livsfarlege. Der foreldre har kjempa i årevis, og vi har trudd på siger og gjennomslag gjentekne gongar. NO trur vi at det er vår tur. Men kva skjer? Ny nedtur. Gong på gong.
Og no er det på han igjen.
Etter å ha kjempa i mange år kom ny barnehage endeleg inn i økonomiplanen i desember 2016.
I mai 2018 sto fyrste kampen. Då var det opprør i krinsen, fordi administrasjonen gjennom Barnehageplan 2018-2024 ønska å prioritere ein barnehage i sentrum i 2019, og skyve barnehagen i Hasund krins ut til 2024. Dette fekk vi heldigvis endra i kommunestyremøtet 21.06.2018, slik at barnehagen i Hasund igjen vart prioritert i 2019. I det same vedtaket satt vi ned ei prosjektgruppe, der dei tilsette i barnehagen var representert, og dette arbeidet skulle kome i gang hausten 2018, slik at vi fekk gjennomført eit godt forprosjekt i 2019. Men denne gruppa vart av ulike årsaker forsinka.
Utsetjingar og trenering har vore den raude tråden i denne saka. I resten av 2018 og heile 2019 spurte eg om når saka skulle komme, og den kom endeleg til politisk handsaming i februar 2020. Men då vart saka utsett pga dårlig saksutgreiing. Vi fekk tre alternativ på bordet, inkl. barnehage ved skulen, som seinare vart skrota av det tverrpolitiske arbeidsutvalet.
I februar 20 bestemmer Kommunestyret at ein utset saka om barnehage pga for dårlege utgreiingar av dei tre aktuelle alternativa. Kst set ned eit arbeidsutval, med medlemmar frå Frp, H og Sp, med Ap som vara. Utvalet konkluderer med at ein bør gå vekk frå alternativet ved skulen, og jobbe vidare med alternativa nytt bygg ved stadion, og påbygg av ‘raudebarnehagen’. Saka skulle komme tilbake i oktober 20. Hausten 2020 vart saka utsett av Ordførar/administrasjon utan å ha vore til politisk handsaming. Etter mykje fram og tilbake vedtok Kommunestyret i desember 2021 at lokaliseringssaka skulle kome på sakskartet igjen våren 2022. Då vart saka igjen utsett fordi Hasundgot kom med eit tredje alternativ. Saka skulle komme i oktober 2022. Den kom ikkje før mars 2023, og då med ei heilt anna tilråding, at administrasjonen vil at vi skal utgreie eit fjerde alternativ, nemleg det allereie diskuterte og forkasta alternativet ved Hasund skule.
No er det på tide at denne saka får si løysing – den har altså pågått i årevis! No er det faktisk på tide at dei folkevalde høyrer på oss som bur i krinsen. Vi ønsker ein ny barnehage, der alle borna får gå i same bygget. Men vi ønsker ikkje at barnehagen skal ligge ved skulen. Kven er det som bestemmer i Ulstein? Er det oss folkevalde, eller er det administrasjonen? Kvifor omkamp om eit (dårlig) alternativ som allereie er skrota? For å spare nokre få kroner? Kva med å bruke av dei pengane kommunen sparte i alle dei åra barnehagen ikkje vart vedlikeholdt, i påvente av at den kanskje skulle rivast? Eller kva med å bruke litt pengar på dei som bur uti krinsane. Er det ikkje på tide at vi også får vår del av ‘kaka’? I sentrum har ein ikkje stussa på å bruke millionar ekstra for at det skal sjå fint ut. Men i Hasund vil dei no bruke 250.000,- på å presse prisen (og kvaliteten) på barnehagen ned? Trist.
Ein av fordelane ved å bu i ein krins som Hasund, er at borna ved Hasund skule har ein fantastisk arena for ski- og akeaktivitetar. Dette er gull verdt for skuleborna sin trivsel og fysiske helse. Kvifor erstatte denne med ein uattraktiv asfaltjungel? No er det faktisk på tide at vi tenker på barna sitt beste. Er det borna våre, og framtida, vi skal spare pengar på?
Kjære folkevalde i Ulstein Kommunestyre, tenk dykk nøye om. I utgangspunktet skulle barnehagen i Hasund krins byggast i 2019. No er det 2023. Lat oss få eit vedtak, og sette i gang med forprosjekt i haust. Bruk heller dei 250.000,- til det.
Og forresten: la du merke til oppramsinga mi i starten av innlegget, av store, kostbare utbyggingsprosjekt som har vore gjennomført i Ulstein dei siste 12 åra? Alle ligg i sentrum.
Helsing Lisa Mari Breivik Anderson, 4-barnsmor, brukar av Sundgotmarka barnehage, glad i krinsen min og folkevald for Senterpartiet